Aunque e BBO di 7 % na frontera proponi ta parce un bon medida pa nivela e mercado pa e provedornan local versus e importacionnan directo, no tin duda cu e prijs di cas lo subi entre 3 % y 4 %. Suponiendo cu 50 % di e costo di construccion ta bin di material y ekipo importa, y e otro 50 % ta di costo di labor, un calculo rapido ta mustra cu e aumento di e prijs di cas, ta rond di 3.5 % = 7 % x 50 %, mas o menos.
E impuesto na frontera lo agrega na e otro factornan cu ya a contribui na aumento di e prijs di cas den e ultimo tres añanan, manera costo di construccion causa pa Covid-19, e aumento di BBO, “invoerrechten” halto, falta di un plan integral pa vivienda pagabel, Airbnbs, scarsedad di vivienda, procedura burocratico, y rekisitonan mas estricto pa desaroya un tereno, entre otro.
Medida economico duro manera e aumento di impuesto cu ta bay implementa durante 2023 ta exigi un “safety-net” pa esnan menos privilegia.
Bou di e scenario actual di un BBO na frontera, un opcion pa suavisa e efecto riba e prijsnan di vivienda causa pa e BBO na frontera lo por ta elimina ‘Overdrachtsbelasting’ pa residentenan di Aruba di 18 te 35 aña cu ta cumpra vivienda pa prome bes; manera nan ta haci na Hulanda caminda e cumpradonan di nan prome vivienda residencial por beneficia di un excepcion di e ‘overdrachtsbelasting’ riba propiedad na un balor averahe di AWG 450,000. Esaki lo compensa e impacto di e prijs di vivienda causa pa e 7% BBO na frontera pa e segmento specifico di e comunidad di Aruba.
Si un persona cumpra un propiedad comercial, un cas pa vacacion of un propiedad pa ‘verhuur’, of e cas no ta su vivienda permanente, e mester paga e “overdrachtsbelasting” actual di 3% pa 6% di e balor. Tambe, si e persona dicidi di muda, e lo mester paga e impuesto riba su di dos propiedad residencial. Esaki ta trece un peso enorme riba personanan di edad hoben cu kier yega na nan propio cas. Escasez di vivienda ta un problema serio na Aruba. Si gobierno reduci e costo pa e cumpradonan pa prome bes mientras cu nan ta mantene e impuesto pa inversionista, gobierno por nivela e mercado pa esnan cu ta cumpra pa prome bes. Simultaneamente, otronan cu ta inverti den propiedad si lo paga e tarifa di impuesto mas halto.
Hopi biaha e inversionista y e comprado pa di prome bes ta compteti pa propiedad cu ta den e mes rango di prijs di cual esaki no ta un posicion husto pa e local cu kier yega na su propio cas. Ta importante pa gobierno tin un plan pa alivia y yuda e pricipiantenan pa bira propietario di nan cas.
Ideal ta si gobierno warda te 2024 pa implementa un sistema riba balor agrega – (BTW) – bon pensa y prueba, hunto cu un revision di e impuestonan di importacion. Mester evita di trata di e asunto pura mesclando diferente sistema cu no ta compatibel sin conoce realmente con nan ta afecta inflacion y crecemento. Manera e dicho ta bisa ‘sopi pura ta salo’, y nos comunidad ni comercio no mester wordo afecta.
E economia di Aruba ya ta riba e caminda di mehoracion. Entradanan a aumenta mas cu a presupuesta. No ta necesario pa pura pa implementa mas impuesto. Mester recauda impuesto di sector comercio informal manera Minister Geoffrey Wever ta propone. Crecemento sostenibel ta keda e mihor opcion.
1 comment
[…] Source link […]