Pastor Marcel Balootje: Rebiba bo matrimonio, cu aprecio, amor y pordon

Bo no tin mester di viaha pa Hawai, ni tampoco regala bo esposo/esposa un auto ultimo modelo pa asina rebiba bo matrimonio.

Tin hopi atake, hopi flecha sendi contra matrimonio awendia, e enemigo ta haci tur cos pa trece confusion y division den matrmonio.

E balor di matrimonio legitimo institui pa Dios entre homber y muher ta un pilar spiritual, social, y familiar cu tin un forsa enorme y cu ta e base di integridad y decensia den nos sociedad.

Hopi biaha por resulta cu un matrimonio por fria, e pareha ta trata otro sin cariño, y esey poco poco ta causa dolor y cu tur consequencia cu esaki por tin.

Hopi ta pensa cu nan tin di busca cariño pafor di cas por ehempel den Happy Hour of den bar, y hasta adulterio y inmoralidad por cay aden,

Den tur pareha por existi diferencia di opinion, pasobra nos tur ta hende.

Pesey nos tin di corda cu pordon ta pa tur hende, pasobra falta di pordon ta pica y un tortura pa bo mes.( Salmo 103:3).

Falta di pordon ta desobedencia na Dios, ( Marco 11 : 25+26).

Falta di pordon ta stroba nos oracion.

Tin cuater yabi cu tur matrimonio mester , pasobra e palabra di Dios ta bisa cu e homber lo bandona cas di su mama y tata y nan lo ta un solo carni. ( Genesis 2:24+25).

Prome yabi ta: Un bon relacion cu Dios, Dios mester ta na prome lugar den nan bida.

Di dos yabi ta: Bon relacion Sexual ( Bon intimidad Sexual).

Di tres yabi ta: Comunicacion ( Papia franco cu otro, no sconde nada, especialmente den area Sexual, Financiero y di Salud.

Di cuater yabi ta: Confiansa ( Intimidad Emocional) Laga amor ta sin fingimento, of mihor bisa stima otro di berdad, no pa placa of propiedad of pa bon curpa of bon tipo, pasobra tur e cos nan ey ta temporal.Laga bo integridad, honestidad y consistencia briya tur momento.

Y pa tanto homber/muher admiti nan fout.

Asina manera esnan cu a wordo scohi di Dios, santo y stima, bisti un curason di compasion, cariño y humildad.mansedumbre y pasenshi. Ademas di tur e cosnan aki bisti amor, cual ta e laso perfecto di unidad.( Colosensenan 3:12-14).

Tin cosnan cu ta parce chikito, pero nan ta di gran balor pa rebiba un matrimonio, por ehempel : Comparti trabao di cas cu otro.

Sali cana hunto, especialmente den naturalesa.

Comparti e mesun icecream cu otro.

Recorda otro con boso a cuminsa.

Cushina hunto.

Sirbi otro desayuno na cama.

Tur esakinan ta cosnan cu ta haci locual cu a fria lanta bek, y semper e amor di Dios lo briya den boso.

Nos tur sa cu awendia tanto e homber como e muher ta na trabao, y e bida matrimonial, mester di hopi atencion,comunicacion y hopi seriedad, pa asina nan por sobrevivi e atakenan cu ta lanta contra nan.

Pesey ta recomendabel un bida di oracion, fuerte, dedica, yena cu amor y firmesa den Cristo Hesus.

Ma no laga inmoralidad of cualkier sorto di impuresa of golosidad ni wordo menciona mey, mey di boso, ni shushedad , ni papia mento di cos di loko, ni chansanan bulgar, cu no ta pas.

Mantene bo matrimonio limpi di mal amistad, pasobra mal compania ta danja bon custumber.No aplica tur cos cu bo ta mira na television y riba internet den bo matrimonio.

Evita pa tur manera cu pornografia por drenta bo matrimonio, pasobra esey ta e cos di mas destructivo cu por drenta un matrimonio, como causante di tur adulterio, inmoralidad y bagamunderia.