Ronella Croes, CEO di A.T.A ta mira bek riba e ultimo 40 añanan cu un sentimento di orguyo y satisfaccion
Aruba Tourism Authority a conmemora e 40 aña di existencia di su oficina na Colombia. Na e ocasion special aki a reflexiona riba tur e exito alcansa durante e ultimo decadanan y alabes a reconoce y gradici tur partner y colaborador cu a haci e logro aki posibel.
E oficina di turismo di Aruba na Colombia a habri su portanan na aña 1983 cu e meta pa promove Aruba como un paraiso turistico y posiciona nos isla como un destinacion preferi cerca bishitantenan Colombiano.
Ronella Croes, CEO di A.T.A ta mira bek riba e ultimo 40 añanan cu un sentimento di orguyo y satisfaccion. E retonan cu A.T.A. a enfrenta durante e trayectoria aki a pusha A.T.A. pa bira mas creativo den desaroyo y implementacion di strategianan di mercadeo na Colombia – un pais cu ta habri portanan y conecta Aruba cu e resto di Sur America. Danki na esfuersonan continuo y dedicacion di tur envolvi, awe Aruba por conta cu un fluho constante di bishitante for di Colombia.
For di 1980 te cu december 2022, un poco mas cu 700,000 turista Colombiano a bishita Aruba, cu ta representa 3% di e 27,000,000 di bishitante cu nos isla a ricibi for di Latino America. Na aña 2022, Aruba a yama bonbini na 1,170,000 turista y di esakinan 370,000 tawata procedente di Colombia, representando 3% di e mercado global. Pa aña 2023, A.T.A. ta proyecta un recuperacion di 105% compara cu aña 2019, cual tawata e miho aña prome cu pandemia.
E recepcion a conta cu presencia di varios invitado special, entre otro e Embahador di Reino Hulandes, Ernst Noorman, presidente di Anato, Paula Cortés Calle, Minister di Asuntonan Economico, Comunicacion y Desaroyo Duradero di Aruba, Geoffrey Wever, Director di Holland House Colombia, Jan Willem van Bokhoven, director actual di A.T.A. Latino America Jordan Schlipken, ex-directora di A.T.A. Colombia, María Victoria Galán.
Ronella Croes a extende palabranan di gratitud y aprecio na tur cu di un manera of otro a colabora cu oficina di turismo di Aruba durante tur e añanan pa por logra e cifranan aki. “Mi kier gradici tur nos partnernan strategico, tanto aerolinea como tour operators y agencianan di biahe cu a apoya y promove Aruba durante e ultimo 40 añanan”, tawata palabranan di e CEO. “Danki pa e confiansa, pa permiti nos habri rutanan nobo y pa boso entusiasmo y compromiso pa bende e producto Aruba. Ronella a gradici medionan di comunicacion y creadornan di contenido tambe, cu ta sigui inspira e mercado Colombiano pa bin disfruta di nos isla feliz.
Durante e recepcion a entrega un reconocimento tambe na Embahador di Reino Hulandes na Colombia, pa gradicie pa su esfuersonan y colaboracion na Aruba y Ofician di Turismo di Aruba.
