Un edishon spesial di e revista Bon Biní Bonaire ku a sali awe ta forma e parti final di despedida di Edison Rijna komo gezaghèber di Entidat Públiko Boneiru.
Den e revista – un publikashon di gabinete di gezaghèber – Rijna ta wak bèk riba e mas ku nuebe aña ku e tabata gezaghèber, manera e kolaborashon ku ‘Den Haag’, e relashon ku medionan di komunikashon ku tin ora tabata tenso, e ‘kestion’ di Chogogo i e temporada di corona ku, manera e ta bisa, a hasi un impakto grandi riba dje. E entrevista ta kompañá pa diferente potrèt di su aktividatnan na i pafó di Boneiru durante e último añanan.
Den e edishon di despedida akí vários relashon eksterno tambe ta bini na palabra ku ta wak bèk riba nan enkuentronan i nan kolaborashon ku Rijna, entre otro e tres mandatarionan ku durante e periodo ku e tabata den funshon, tabata responsabel pa Relashonnan den Reino, esta minister Plasterk i e sekretarionan di estado Knops i Van Huffelen. Pa medio di un QR-code por bolbe wak un reportahe di video di e resepshon di despedida di 18 di aprel. Finalmente den e edishon akí e lesadó por sera konosí mas djaserka ku gezaghèber interino Nolly Oleana.
Por download e edishon spesial di Bon Biní Boneiru for di www.bonairegov.com
