Investigacion forensico di RDA tin 2 aña cu a keda cla y den e investigacion aki a sali diferente puntonan cu ta hopi mahos pa Aruba. Sinembargo despues cu e rapport a keda cla no ta mira un adelanto di pone esunnan cu mester para responsabel pa e mal maneho den RDA cu awe te ainda Aruba ta pagando.
Loke cu mester ta bon cla cu no ta gobierno di Aruba a haci e investigacion den RDA pero e board di hunta di comisario di RDA a haci un investigacion Forensico y na momento cu e rapport ta cla nan a entrega esaki na parlamento, gobierno di Aruba y e rapport a keda trata tambe den parlamento.
Na momento cu a trata e rapport den parlamento a tuma nota cu ex minister Mike de Meza tabata tuma decisionnan hopi preferencial pa un cierto grupo unda cu ex minister Richard Arends tabata gana salario di RDA y gana salario di minister pareu y mientras cu e ta minister e ta duna instruccionnan pa haci pagonan.
Tabatin 21 miyon florin di e compania di RDA cu a keda gasta den apenas 2 aña sin cu algo a keda atras. Segun prome minister Evelyn Wever Croes ni e edificio na unda cu e oficina ta di RDA ta , ta di nan. Un total di 21 miyon florin a disparce entre e personanan cu ta cerca di e gobernantenan.
Segun prome minister Evelyn Wever Croes e hunta di comisario a entrega gobierno e rapport y nan a indica cu nan lo bay carga e responsabilidad como doño di trabao pa esunnan cu tabata traha den RDA na e momento ey ainda cu ta parti di e investigacion y nan a keda retira. Na e mes un momento hunta di comisario a entrega un keho na ministerio publico y e investigacion ey ta andando y ainda no a haya contesta di ministerio publico.
Segun Prome Minister Evelyn Wever Croes gobierno mes no tin un rol activo den esaki mirando cu ta trata di un compania estatal y e hunta di comisario a carga e responsabilidad y gobierno a keda informa. Tambe segun prome minister Evelyn Wever Croes no ta trata di placa di gobierno cu a bay den RDA , pero ta trata di placa di e compania cu ta genera atrabes di e FMSA y placa cu valero a laga atras ect ect.