E imagen di e ser femenino di color, descendiente di e ser Africano aki den Caribe, mester wordo trata cu respet y dignidad, mescos cu di tur otro ser femenino. Specialmente na un pais den Reino Hulandes, Isla den Caribe, cu ta bringando cu su identidad y e historia di esclavitud, manera Sra Lusette Verboom a splica. Rey Willem Alexander a compronde e implicacion di esaki bon bon y a nenga di pinta e Chichi Serena® durante su bishita. E siman aki ta celebra 15 aña di e Chichi. Mi ta hayele importante pa comparti pakico e imagen aki ta uno racista cu mester wordo elimina for di e area publico. No tur hende ta comparti e opinion aki cu mi, mi ta respeta nan opinion. Esnan cu si ta pensa mescos, mayoria biaha ta keda keto, pasobra nan kier evita un discussion. Brinda mi e espacio pa splica mi punto di bista.
Caricatura Racista
E imagen aki ta parce varios imagen cu mi conose cu ta mara na e era di esclavitud. Entre otro e dama esclavisa Saartjie Baartman, e karikaturanan Mericano yama ‘Mammy, Sambo y Coon’ y e imagen di e marca Aunt Jemima. Tanten cu e imagen aki tawata limita na e galeria di arte di Sra Serena Israel, mi por a evita di encontra esaki. Awor cu e ta pon’i den e area publico, na Punda y den lama na Korsow, a bira tempo pa lanta un discussion publico. Aparentamente, e conosemento general, di nos tur cu ta biba den Caribe y Europa, ta falta informacion clave tocante nos herencia historico. Un di e effectonan di esclavitud, ta cu e cultura dominante ta dicidi kico ta wordo educa nan nos hendenan. Durante e era di eslavitud, e ser femenino di decendencia Africano tambe a wordo dehumanisa na un manera structural, pa asina perpetua esclavitud y crea un actitud negativo y agresivo dirigi na un grupo etnico cu ta wordo reprimi door di e cultura dominante. Den e caso aki, no ta solamente Sra Serena Israel ta culpable di perpetuacion di dehumanisacion di e ser femenino Africano, pero mas artista di cuadra etc. Pero door cu ta su creacion ta den varios area publico na un manera grandi cu bo no por scapa esaki, mi ta uza e Chichi Serena® como ehempel y mi ta convenci cu Sra Israel lo pensa mescos si mayan un artista di Korsow pone un karikatura di un hudiew na e Brandenburger Poort na Berlijn. Chichi Serena® den mi opinion, ta un forma di indoctrinacion y deshumanisacion di e ser femenino Afro-Caribense, cu ta un peliger pa nos hende muhernan y nos yiu muhernan awe y den futuro.
Saartjie Baartman
Pa esnan cu no conose e storia tragico di e bida di Saartjie Baartman (1789-1815), un resumen cortico. E orphano Saartjie a haya su nomber di e famia Hulandes cu a esclavis’e na un edad hopi jong na Sudafrika. E tawata domina Hulandes miho cu Frances y Ingles. Ora su casa a wordo mata door di colonialista Hulandes, el a wordo cumpra pa pa E tawata un dama di e tribo KhoiKhoi di e Reino Xsosa. Pavia di su aparencia fysico, cu ta yama ‘staetopygia’ (chan chan grandi y pianan diki) el a wordo exploita y trafica pa traha den un circus na London y Paris. Entiero di su restonan a tarda 187 aña, pasobra diferente parti di su curpa a wordo uza pa testnan scientifico y a wordo exhibita den diferente museo. E tawata wordo yama pa e insult racial: Hottentot Venus. Pues, pa mi wak un statua memey di Punda di un ser femeno pinto e color mas preto cu tin, cu falta personalidad, pasobra e no tin un cara, cu falta man y pia, cual ta lagele mustra indefensivo, sinta mescos cu a caricaturanan di Sambo, Coon y Mammy di e era di Jim Crow. Un imagen asina di un ser femenino di color scur ta un forma di indoctrinacion cu no ta diferente for di esun di Zwarte Piet. Durante e mesun tempo cu nos tawata bringa pa elimina e caricatura racista di Zwarte Piet y danki na e rapport di e Commission pa Eliminacion di Racismo y Discriminacion) CERD na augustus 2015, cu a ‘avisa’ Gobierno Hulandes pa elimina Zwarte Piet dentro 5 aña, e Chichi Serena aki a crece den su popularidad. Enbes di 3 siman pa aña, awo nos tin cu wak un caricatura di un muher di color 24/7 y 365 dia pa aña. Cu un narrativa horta for di nos mesun cultura y adapta. Pasobra, den e splicacion di Sra Israel riba su website, e Chichi Serena® ta un muher fuerte, orguyoso y sensual. S color preto no ta un color di cuero. Sinembargo ta net e color eye l a scoge ma mass produci, pasobbra e ta esun cu ta bende miho. Claro, e ta bende miho, pasobra e indictrinacion di colonialism ainda ta vigente bou di esnan cu un cara manera e luna. . Un ruman muher grandi cu ta cuida su rumannan chikito cu dedicacion. Den mi famia, di banda di mi tata, na Boneiro y na Aruba e nomber Chichi ta un nomber cu nos ta uza cu hopi respet pa e ruman muhernan grandi. Un Chichi ta un dama digno cu ta respeta su mes y su rumannan chikito y no tin nada di haber cu sensualidad. E parti sensual ta bin for di fascinacion cu semper e personanan Europeo tin cu e curpa di e ser Africano. Cu a causa hopi abuso den pasado pa nos antepasadonan entre otro Sra Lokhay, di Sint Maarten y Sra Alida di Surnam, cu aunque pa diferente motibo, ambos a haya como castigo cu un di nan pechonan a wordo corta. Pa asina ainda nan por duna lechi di e unico pecho cu a sobra na e yiunan di e Shon y su casa.
Venus
E fenomeno aki, caminda un miembro di un cultura dominante (Europeo) ta tuma algo, manera e palabra Chichi y su historia, di e cultura cu e mes no ta forma parti di dje, ta yama apropiacion cultural. Mayoria biaha e cultura cu ta wordo victimisa asina, no tin e fondonan, no tin a conosemento di e nificacion simbolico y su effecto psichologico riba nos propio yiunan di tera. Mayoria di nos hende muhernan sa y mester a siña biba cu e hecho cu aunque nos curpa ta wordo admira y quirurgico copia, na e mesun momento nos ta alerta pa cualkier momento cu nos por wordo intimida sexualmente. Un comparacion cu e Nana preto di Niki De Saint Phalle, ta un arte traha pa empodera. E arte di Fernando Botero (Colombia), ta mustra imagen cu tin un base politico, social y no ta un caricatura racista. E Venus de Milo (2.08m, traha di marmer, Paris, Francia), e Venus di Willendorf (traha di piedra Vienna, Austria) y e Venus di Holhe Fels (traha di piedra, Schelklingen, Alemania) nan tur ta para den un Museo, protehi y balora enbes di produci riba un plantacion di arte, pa artistanan local cu merece reconocemento y un pago husto pa nan trabou. E no ta un trabou di produccion, pero tambe arte creativo. E Chichi Serena ta haya un number y no un nomber y ta wordo trafica rond mundo pa bolbe caba captiva den un cas di e ser Europeo. Mi kier pone emphasis cu tur esaki ta mi opnion propio, pasobra cada ken por wak den un pida arte locual e ta pensa.
Malcom X speech 22 di mei 1962
Manera Malcolm X a bisa riba dia 22 di mei 1962 durante su speech na Los Angeles California: “The most disrespected person in America is the black woman. The most unprotected person in America is the black woman. The most neglected person in America is the black woman.” Observacionnan di Malcolm X cu te awe ta conta mundialmente pa e ser femenino di color. Ban proteha e imagen di nos antepasadonan, di nos rumanan, nos yiunan, sea ta masculino of femenino, No laga otro hende dicta ken nos ta y ki balor nos tin y hinca e imagen di nos antepasadonan den e mesun lama cu nan a wordo tira, despues cu nan fayese durante a biahe Transatlantico. Caminda mescos cu e Chichi Serna, nan no tawata tin nomber, a kita nan identidad, personanan “sin cara” di cual nan horea tawata wordo corta pa por garantisa e pago di e compania di seguro. Esey ta mi observacion mi contribucion pa proteccion di mi cultura, di mi hendenan y di futuro generacion.