Miho bo keda keto y a pasa pa sabi cu habri bo boca y mustra con bobo bo ta. Ora bo construi riba un fundeshi di mentira tardi of tempran bo edificio lo cay den otro. Ora bo hiba un campaña di mentira lo bo por spera di bay recohe un cosecha di mentira. Awe nos pueblo ta bibando den dolor door di a kere politiconan mentiroso cu durante campaña a primiti cielo riba terra. Hopi papia pero nada di contenido. Berdad satanas ta bin bisti na carne pa asina logra su metanan. E gobierno mentiroso aki di berdad a logra su meta pa faborese un grupito mientras mayoria tin cu biba den miseria mientras e clase media ta desapareciendo. Nos mester kere di berdad e lema cu World Economic Forum esta cu pueblo lo no tin nada y pueblo lo ta feliz.
Minister di economia ta papia di negoshinan illegal cu no ta paga belasting y ta calcula di ta 1.2 biyon di florin cu no ta drenta den caha di gobierno. Esaki ta motibo pa kiko cu mester bin cu BBO na frontera y esaki simpelmente un argumento fofo y sin base. Tin berdad negoshinan cu no ta paga belasting pero nos no ta kere cu e ta yega na e suma ey. Bida na Aruba ta asina caro cu hende no por biba di un sueldo minimo mas. CBS a splica na placa chikito cuanto placa un persona mester tin pa por hiba un bida dignamente cual ta awg.2528,=. Nos grandinan tin di biba cu un pensioen di awg.1215,= y for di eynan nan mester paga nan eigenbijdrage na remedi, awa y electricidad, grondbelasting, huur etc, sin papia mes di esnan cu no tin trabao y esnan cu ta biba di onderstand. E hyper inflacion cu ta sutando Aruba ta hasi bida di cada ciudadano hopi mas dificil. Gobierno no ta interesa den nos grandinan y ta prefera laga nan muri. Partido Curpa a bisa mas cu un biaha cu nos mester honranan nos grandinan y no deshonra nan. Saba ta keda den un ambiente insigur y nos ta mira cu e minister enbes di duna cara ta prefera busca un conflicto. Partido raiz ainda no kier realisa cu partido mep a tuma e bolo pa nan so y simplemente ta laga partido raiz luci hopi malo. Aruba Post NV tambe ta sigui den problema sin cu nan lo por mira un luz na horizonte.
Un otro situacion cu ta hala attencion den e ultimo lunanan ta e overtime di polisnan. Fuera cu nos cuerpo policial tin scarsedad di personal. E motibo ta cu gobierno ta prefera di hunga cu seguridad di polisnan y nos pueblo door cu no tin klas nobo di opleiding. Den e ultimo añanan na 6 occacion no tabata tin opleiding di polis. Pa añanan largo polisnan a wordo maltrata pa gobierno tras di gobierno. Si nos mira bon mayoria empleadonan publico a wordo maltrata pa mal maneho di gobierno. A laga polisnan traha den un edificionan cu ta malo pa salud di e trahadornan. Tin rapport traha for di aña 2013 cu ta relata e mal estado di warda di polis Oranjestad. A pefera di tene e contenido di e rapport scondi pa hopi aña y di e forma ey ignora e salud di nos polisnan. Un edificio no ta bay atras di un dia pa otro sino e ta dura hopi aña si no tin mantencion ta tuma lugar. Esaki nos gobierno ta campeon aden. Nos pais a wordo goberna pa partido mep y pa partido avp.
E concepto di ley di matrimonio di mesun sexo a yega Parlamento. Tin procesonan ainda cu mester tuma lugar prome cu e wordo trata pa nos parlamentarionan. Segun nos por a compronde cu casi 17 mil a firma un peticion pa gobierno bay cassatie. Partido Curpa a trese pa dilanti cu cassatie lo tuma su tempo y e otro caminda ta via di Parlamento por presenta un concepto di ley cual partido Accion21 a hasi uso di dje pa presenta un concepto di ley pa e matrimonio di mesun sexo. Si e ley aki wordo trata den Parlamento entre 15 pa 16 parlamentario lo vota na fabor y asina wordo aproba. Nos parlamentarionan supuestamente Cristian cu ta forma parti di un gobierno cu ta di acuerdo cu e metanan di desaroyo sostenibel agenda 2030. Un agenda cu ta contra leynan di Dios y e parlamentarionan aki tin miedo di tuma un posicion y bisa gobierno ta basta. E agenda aki ta pa caba cu e famia, nos criaturanan y tambe contra di tur nominacion Cristian y asina mes e supuestamente cristiannan ta keda colga na gobierno. P’esey mes partido Curpa ta keda e unico alternativo pa un cambio caminda bienestar general lo ta na prome lugar.
