Den reunion di Parlamento pa trata e desishon ku Minister a tuma pa eksonera debenan kuantioso di impuesto, Minister Silvania a bini ku diferente akusashon dilanti kual no tin base i no ta kuadra ku bèrdat.
Kaha di Gobièrnu
Na momento ku Minister Gijsbertha a baha tabata tin fondo den kaha di Gobièrnu i di forma responsabel pa no laga Gobièrnu nobo eventual den un situashon ku no tin sufisiente likides futuro a bai laga un petishon di Fiansa di 186 mion florin. Di esaki gabinete Pisas a fia 168 mion pa asina por a sigui maneha Kòrsou den e situashon di pandemia. Mester bisa aserka ku Gabinete Pisas / Minister Silvania ora ku a risibi e fiansa di 168 mion, no a usa esaki pa NOW ni tampoko pa duna sosten sosial na esnan den nesesidat sino a usa e montante kompletu pa presupuesto / kaha di gobiernu.
Den e “liquiditeitspositie” kual ta keda traha pa ministerio di finansa por tuma nota ku Minister Gijsbertha a baha i laga saldo di 127 mion florin positivo. Alabes ta bon pa rekorda minister Silvania ku Minister Gijsbertha tampoko no a hasi ningun fiansa durante prome 6 lunanan di aña 2021.
Tambe Minister di Finansas i MFK ta trese mentira kaminda ta bisa ku a usa plaka di fiansa di Hulanda pa paga debe na APC i SVB. Esaki no ta kuadra ku realidat. Den un karta di CFT fecha 24 di yüni 2020 CFT ta indika ku esaki no ta kuadra i ku Kòrsou a paga debe na APC i SVB for di su propio fondonan.
Schommelfonds
Otro mentira ku Minister di Finansas a bini kun’e den Parlamento ta kaminda Minister ta indika ku bou di gobiernu anterior Schommelfonds tabata tin un defisit. Mester bisa ku for di 10-10-10 Pais Kòrsou no a konose un defisit riba schommelfonds. Pais Antias prome ku desmantelashon a laga un debe di schommelfonds atras na SVB di 80.5 mion.
Retraso den aanslag
Otro punto nan ku MinFin a trese dilanti ta ku tabatin 3 aña di retraso pa saka aanslag di OZB i 2 aña retraso LB i IB.
No a saka aanslag di OZB pasombra parlamento a aprobá kambio di lei di OZB kaminda tarifa nan ta baha ku 50% pa pueblo i ta bai forsa retroaktivo te ku 2019. Tabata warda publikashon di e lei pa por saka aanslag ku tarifa nobo. Kual minister Silvania a nenga di publika pero si ta eksonerashon di impuesto na esnan ku debe miones.
Riba retraso di aanslag di LB i IB tur hende sa ku a kima kantor di belasting na 26 di ougustus 2019 kousando retraso den trabou nan i despues COVID 19 a dal aden na 13 maart 2020 i ningun Deurwaarder ni tampoko Invorderaar no tabata kier a bai niun kas di hende of negoshi pa entrega aanslag pa asuntu di reglanan ku Gobièrnu a implementá di COVID.
Un biaha mas nos por mira ku Minister Silvania ta buska otro argumento pa tapa e fayo ku el a komete i kontra di lei pa duna eksonerashon di impuesto na esnan ku debe miones. E akto aki ta keda konfirma pa propio Ministerio Publiko kual a pone minister Silvania bai kambia algun kos kual te ainda no tin base legal pa hasi esaki. Alabes e akshon di eksonerashon indebido di minister Silvania a lanta bastante stòf, pregunta I disgusto serka miembronan di Tweede Kamer i inkluso sekretario di estado señora van Huffellen ta warda riba reakshon di minister Silvania pa por kontesta miembro nan di Tweede Kamer.
