Musical ‘Mi ta un Artista’

Grupo di Teatro Zengenue di Fundacion CCCA ( Crea, Conserva, Cultura y Arte na Aruba) bou direccion di Sr. Ferdinand Franca, ta presenta dia 2 y 4 di juni 2023, e Musical: ‘Mi ta un Artista’ na Cas di Cultura. E Musical aki ta dedica na dos directoranan di scol di baile cu ta Samanta Westera Juppa di scol di baile Club di Movimiento y Sonja Geevers cu ta directora di scol di baile ‘Step by Step’.

Sr. Ferdinand Franca actualmente ta docente di CKV na Ceque College Mavo y ta director di Teatro. Debi na e exito grandi aña pasa cu e Musical: ‘Planta awe, Cosecha mañan’, a dicidi pa continua cu e genero di Musical y trece mas Musicalnan original na idioma Papiamento. Cu e Musical: ‘Planta awe, Cosecha mañan’, a logra capta interes bou di e hobennan pa drenta e area di Arte y Cultura di Aruba. Nan lo presenta e aña aki den e Musical, ‘Mi ta un Artista’. Tambe hopi hoben y adulto a disfruta di un show di kita sombre y awor ta pendiente pa e siguiente Musical.

E Musical ta conta cu un elenco di mas o menos 50 hoben. E elenco ta consisti di mas di 15 hoben actor. Loke ta e parti di baile a invita scol di baile Club di Movimiento, bou direccion di Samanta Westera Juppa. Tambe tin grupo di baile ‘Kids and Youth in Action’ bou direccion di Debra Boekhoudt, un grupo di hoben dirigi pa Jason Wester y Shaindra Ashby.

Lo tin 2 acto den e Musical. Acto 1 ta refleha e soño y deseo di Francine pa bira un bailarina. E lo topa obstaculonan den su caminda y e Ada-padrinonan lo t’ey pa stimula y motiva pa e no rindi y lucha pa su soño. Acto 2 lo refleha tur loke ta e bataya interno di Francine pa por logra su soño y bira e persona cu e kier bira den futuro. Tur dos acto tin temanan di deseo, lucha pa bo pasion, no rindi, pensa cla y habri curason, bira e persona cu bo kier bira y hopi tema mas.

Ta bay tin varios genero di musica, tecnica di teatro innovativo, bailenan moderno, y un decoracion y arte visual diferente. E ta un obra humoristico y magico, unda cu tur persona por siña hopi di dje. Nos ta invita tur mucha, hoben y adulto pa bin presencia e Musical aki.

Fundacion CCCA tin como meta pa prepara mucha, hoben y adulto den e Arte Escenico, pa nan por salvaguardia e existencia di Arte y Cultura na Aruba. Ya esaki ta di dos Musical cu CCCA ta presenta y lo tin hopi mas den futuro. Tambe ta dunando les di Teatro den barionan hunto cu Ateliers ‘89 cu e programa Arte den Bario. Na scol di Arte na San Nicolas lo cuminsa duna mucha/hoben y adulto den luna di juni, lesnan gratuito di baile y teatro pa lanta gruponan den e bario.

Fundacion CCCA conhuntamente cu Cas di Cultura tambe ta cu e programa educativo pa scolnan basico: ‘E Capuchon Cora’ cu lo wordo presenta pa e scolnan basico riba dianan 29 y 30 di Mei y dia 3 di Juni pa publico en general. E meta di e programa aki ta pa pone e enfoke riba e muchanan pa asina cuminsa inculca e Arte y Cultura for di un edad chikito. Tambe Fundacion CCCA ta investiga, documenta y publica loke ta Arte y Cultura di Aruba.

E carchi ta solamente 25,- florin y ta obtenibel na Cas di Cultura y Plaza Bookshop y na e participantenan di e Musical. Por yama tambe na 7309696 pa por deliver e ticket. Nos kier a gradici Unoca, Departamento di Cultura Aruba, BK Consult y Mixed Media, pa nan tremendo aporte pa nos por a realisa e Musical aki. Tambe nos kier gradici e mayor- y alumnonan cu ta participa. Nos ta invita tur mucha, hoben y adulto pa bini presencia e Musical y apoya nos talento y produccion local. Nan lo bira nos futuro cantante-, actor- y directornan den futuro.