Pa conscientisa riba MS y recauda fondo
Dia 28 di mei awo Meneer Delo Maduro hunto cu su team ta organisa un caminata pa conscientisa riba e malesa Multiple Sclerosis y recaudacion di fondo pa un tratamento cu e mester sigui den exterior.
E caminata mes ta tuma luga dia 28 di mei awo saliendo for di Costa Linda te na Phoenix y bolbe. En total 5 KM.
Como cu e tema di e aña’ki di Dia di Multiple Sclerosis (30 di mei) ta Connecting ta invita tur esnan cu kier participa y coopera cu Delo Maduro pa bini, ademas di algo color oranje, sea pa cana, pa participa cu bicicleta, rolschaats of den rolschoel, inclusive cana cu bo cacho. Importante ta pa conecta cu otro y siña mas di MS.
Delo, kende ta un docente pa 23 aña caba, ta hopi afecta emocionalmente pa e hecho cu e no por practica su profesion, cu ta e alegria di su bida. A causa di efectonan secundario di e malesa MS, e ta hopi limita den su trabou pa cual aworaki e ta traha solamente como un invaller, Su deseo ta pa mehora su calidad di bida p’asina e por dedica hopi mas aña na e muchanan di Aruba, ya cu e ta docente na Kleuterschool.
El a conta cu el a wordo diagnostica cu e malesa aki cuatro aña pasa ora cu el a bay Colombia pa un dolor agudo. Den MRI haci a descubri manchanan den su wes’i lomba y cu a resulta di MS. E tin un ruman homber tambe, Enzo, kende a haya e malesa aki cu su 20 y pico di aña. Lamentablemente a tarda hopi den e diagnostico y a cuminsa cu un tratamento despues cu e malesa a afect’e basta caba. E ta un malesa cu mester tuma un hangua tur siman, pero awendia mayoria di e pashentnan ta tuma un pildo. No tin cura ainda pa e malesa aki. Mas trempan diagnostica MS, e ta miho pa pashent. Na Aruba tin 30 persona registra cu e malesa, cu ta wordo yama e malesa di mil cara. Esaki pasobra tin diferente tipo di MS y cerca algun pashent e ta visibel y cerca otronan. Den e caso di e dos rumannan Maduro, cada uno a hay’e diferente. E prome a tarda pa haya un diagnostico y den caso di Delo a haya un diagnostico di MS hopi lihe. Aunke cu pa e malesa mes no tin cura, si tin tratamento pa mehora calidad di bida.
Pa por logra su meta di mehora calidad di bida, e lo mester un tratamento pa e vertigo cu el a haya cu ta esun mas extremo den cada atake cu e sufri. A haci investigacion y a haya sa cu na Merca tin un clinica specialisa cu por yuda persona cu e vertigo extremo aki mehora pa un 95%. Sinembargo esaki ta algo cu no ta wordo cubri pa AZV. Pa e motibo aki ta organisando e caminata pa recauda suficiente fondo pa cubri e tratamento intensivo di un siman largo, di mainta te atardi, na Merca. E gastonan di pasashi, estadia, transporte y alimento ta wordo cubri pa Delo mes y su famia. Tur loke cu wordo recauda ta bay exclusivamente pa e tratamento, pa cual e citanan ta acorda caba pa luna di juli.
Ta invita tur organisacionnan of negoshinan pa encurasha nan trahadonan pa participa den e evento aki, cu su participacion lo ta solamente 10 florin.
Ta cuminsa registra pa 7’or di mainta na Costa Linda. Pa cumpra carchi por tuma contacta cu e siguiente numbernan: 5625225 – 5619020 – 5657077. Por manda un whattsapp tambe na e mesun numbernan cu tur datos, si mester di ticket of ta simplemente haci un donacion.
Ken ta meneer Delo
Cesar Fidelo Maduro tin 50 aña di edad y ta maestro di scol preparatorio ya pa 23 aña.
Na 2019 el a stop di traha fulltime den clas y a bira invaller. Esaki pa motibo cu a wordo diagnostica cu Multiple Sclerosis. El a haya un dolor neuropatico na mi curpa cu cada bes mi tabata ausenta. Asina mes el a sigui traha cu hopi amor y dedicacion.
Sinembargo na november 2020, despues di 7 luna cu el a haya covid, a surgi un biramento di cabes (Vertigo) masha horibel mes. Ora cu el a recupera, nunca mas e balans a bay bek na 100%. “Cada tanto tempo mi tabata haya atakenan di e biramento di cabes(vertigo). Esakinan tabata converti mi den un persona cu hopi temor y isola di bida social. Mi a busca ayudo cerca diferente dokter. Conclusion di e buscamento di ayudo aki ta, cu no por haci nada aki, y mester siña biba cu esaki y bebe pildonan.
Pa es motibo aki mi a cuminsa busca ayudo di exterior. Y asina mi a bin haya sa di functional neurologist na Merca. Ta un doctor cu ta trata diferente problema di e celebro sin haci uzo di operacion of remedi. Buscando mas informacion detaya di e tratamentonan aki. Mi a logra di haya un consulta cu un doctor di un functional neurology clinic y el a splica mi kico tur nan ta trata y e posibilidad ta 95% cu mi situacion por wordo drecha. Pues, librami di e vertigo aki cu ya mi ta sufriendo di dje pa 2 aña y 5 luna.”
E tratamento intensivo cu lo bay haci, lo dura 5 dia di 9or pa 5 or di atardi. E gastonan pa e full e tratamento lo costa awg. 10.000,-.
1 comment
[…] Source link […]