Boneiru presente na Caribbean Latin Workshop na Gent, Bélgika

Dia 11 di mei 2023 ku orguyo Boneiru a partisipá na e Caribbean Latin Workshop na Gent, Bélgika. E evento akí a trese profeshonalnan den biahe huntu i a ofresé nan un oportunidat pa sera konosí ku diferente destinashon. Presensia di Boneiru durante e tayer akí a pone Boneiru mas bou di atenshon riba merkado belgikano. 

Durante e Caribbean Latin Workshop e profeshonalnan den biahe a haña un oportunidat úniko pa drenta den kòmbersashon ku representantenan di Boneiru den un asina yamá ‘speeddate-setting’. Marjolein Oleana i Annette Emerenciana di Tourism Corporation Bonaire tabata presente pa bai den kòmbersashon ku e invitadonan ku tabata presente pa papia tokante e diferente aspektonan di nos isla, entre otro kultura, outentisidat, aktividatnan aventurero, prestashonnan kulinario eksepshonal i hopi otro kos ku Boneiru tin di ofresé. Ku un partisipashon di mas ku 80 persona, e tayer a resultá di ta un tremendo oportunidat pa pone Boneiru mas bou di atenshon riba merkado belgikano. TCB ta spera di yama bon biní na mas bishitante for di Bélgika riba e bunita isla akí.

Boneiru su partisipashon na e Caribbean Latin Workshop na Gent a fortifiká posishon di nos isla komo destinashon tòp pa biaheronan belgikano. Banda di esaki tabatin un patrosinio spesial di The Cadushy Distillery pa Ròm Rincon, kaminda e invitadonan a haña un chèns pa purba nos ròm boneriano durante e kòmbersashonnan tokante Boneiru. Tourism Corporation Bonaire ta gradisí Eric Gietman di The Cadushy Distillery pa e patrosinio generoso akí.