Esey ta un pregunta cu ta wordo haci rond mundo , pasobra hopi no ta kere cu pronto e Yiu di Dios lo ta bek bin busca su pueblo.
Bijbel tin 100 versiculo cu ta papia di e binida di Cristo Hesus. Pero nos tin di corda tur hende manera Juan 3:16-18 ta splica nos; Esun cu kere lo ta salba, Esun cu no kere lo ta condena, pasobra e no a kere den e Yiu unigenito di Dios.
Salbacion ta personal y no laga ningun hende kere cu pasobra mayornan ta salba, of bo enemorada ta salba, of pasobra bo esposa ta salba esey ta nifica cu bo tambe lo bay cu Señor .
Pasobra Dios no ta chansa.
Dios sa ken ta di dj’E y ken tin curason dobbel.
Dios no ta haci acepcion di persona.
Dios no tin hende preferencial, esun cu haci bon lo cosecha bon, y esun cu haci malo lo cosecha malo.
Tur decision cu hende tuma den nan bida concerniente Cristo Hesus, mester tuma lugar awor cu bo ta na bida, ya cu ora bo muri , nada mas ningun hende no por haci pa bo.
No laga ningun hende gañabo, ningun hende no por haci bofon di Dios.( Lucas 16:19-31).
Palabra di Dios ta mustra nos claramente cu dos lo ta den un cas, un lo bay e otro lo keda, , nos mester ta prepara pa e binida di Cristo Hesus.( Mateo 24:40-42).
E mundo ta asina tanto envolvi den inmoralidad, malicia y perversion cu e spirito di anti-cristo ta lantando un ehercito contra Cristo Hesus.
Y tur esnan cu ta contra e palabra di Dios.
Tur esnan cu no ta respeta Dios.
Tur esnan cu ta biba den orguyo,
Tur esnan cu ta rechasa Dios ta formando parti di e ehercito aki.
Hopi hende ta buscando problema pa nan bida, sin nan tene cuenta kico tin na caminda.( Galationan 5:19-21).( 1 Corintionan 6:9).
Pesey e palabra di Dios ta bisa:
Pa e motibo aki, boso tambe sea prepara, pasobra e Yiu di Hende lo bini na un ora cu boso no ta pensa.( Mateo 24:44).
Pasobra e Yui di Hende lo bin den e gloria di su Tata, hunto cu Su angelnan. Anto E lo recompensa cada ken segun su obranan.( Lucas 16:27).
No ta un cuenta ni tampoco fanatismo, tampo religiosidad, pero tur hende ta mira e locual ta pasando riba mundo y cu tur cos ta saliendo for di man, pasobra tur hende cu tende di cambio climatologico, sa masha bon cu ora naturalesa lanta ningun hende no por cune.
Tampoco tin placa ni sabiduria cu por domina naturalesa.
Tene bon cuenta semper ora tabatin un temblor ningun hende tabata sa di unda e ta bin, semper ta despues hende por a reaciona.
Nos tur tin di corda cu e diluvio den Genesis capitulo 6 tabata un cambio climatico cu solamente Noe y su famia, cu tabata biba den obedencia na Dios, por a a scapa.pasobra nunca prome awa a yega di yobe riba mundo.
Pero mescos cu den e tempo ey hende nan tabata rebeldia y haci bofon, asina tambe mesun cos ta sosode riba e dia di awe.Pero awor maldad y inmoralidad ta wordo aproba door di gobernantenan rond mundo.
Laga nos no lubida cu Dios ta duna tur hende mesun oportunidad pa kere den su yiu Cristo Hesus, biba pa Cristo y bay cu Cristo ora e bin busca su Iglesia.
Por fabor no laga ningun hende gaña boso, Cristo Hesus ta na caminda.
