Boneiru ta un munisipio speshal di pais Hulanda pa 13 aña kaba. Fo’i un prinsipio Hulanda a primintí pa regla un nivel ekivalente di bida i siguridat sosial pa tur Boneriano. Pero lamentablemente te ainda e pueblo di Boneiru no ta risibí e mesun nivel di benefisionan ku e habitantenan di Hulanda Oropeo.
Pa 13 aña largu e sueldo mínimo na Boneiru ta hopi mas abou ku esun di Hulanda, i e sueldo aki no ta alkansá pa por biba normal di dje. Tur esten ku kosto di bida na Boneiru ta hopi mas haltu ku na Hulanda. Aktualmente sigur 40% di e poblashon lokal na Boneiru ta biba den pobresa, i esaki ta inaseptabel.
Boneiru tin hopi aña ta insistí seka gobiernu Hulandes pa establesé un mínimo sosial realistiko pa Boneiru. Un mínimo sosial ta e suma ku un hende mester minimalmente pa por kubri su nesesidatnan básiko. A hasi masha hopi estudio kaba i skibi diferente rapòrt, pero ainda e gobiernu di Hulanda ta nenga di fiha un mínimo sosial.
Hulanda Oropeo mes tin un mínimo sosial fihá pa hopi dékada kaba. Sueldo mínimo i ònderstant ta basá riba e mínimo sosial aki.
E miembronan di “Eerste Kamer” i “Tweede Kamer” na Den Haag ta trata mínimo sosial pa Hulanda Karibense komo un topiko di prioridat. Òmbutsman Nashonal i e Kolegio pa Derecho Humano ta hala gobiernu Hulandes su atenshon konstantemente riba e tema aki. For di Boneiru mes, tantu e polítikonan lokal komo sindikatonan, dunadónan di trabou, lídernan religioso, banko di kuminda i union
di konsumidó ta pusha pa hopi aña kaba pa gobiernu Hulandes pone un mínimo sosial. E nesesidat ta birando mas i mas urgente.
Tòg no a logra durante 13 aña largu. Aunke ku a dal algun stap, esaki ta leu di sufisiente pa solushoná e pobresa inaseptabel. Pa e motibu aki a bira tempu pa nos uni i ekspresá nos malkontentu klaramente.
Partido MPB ta di opinion ku no por sigui asina. Nos ta invitá tur hende na Boneiru pa sali dilanti pa un bida digno pa e pueblo di Boneiru. Ban nos tur uni nos mes ku e manifestashon, djabièrne 12 di mei aki. Nos ta topa otro na e sitio di parkeo di Van den Tweel, mitar di sinku atarti (16.30).