Entrante promé di febrüari 2023 a bini repartishon nobo di e polisnan di bario na Boneiru. Durante e seis siman nan tras di lomba, Kuerpo Polisial Hulanda Karibense (KPCN) a pone lus riba agentenan ku ta funshoná komo polis di bario na Boneiru i Sint Eustatius ku e meta pa komunidat por sera konosí mas di aserka ku e polis di su bario.
A start e kampaña na Sint Eustatius i a sigui na Boneiru ku e polisnan di bario di Playa, Tera Kòrá, Rincon, Nort Saliña i Antriol. Kada siman un polis di bario tabata na turno. Komo parti di e kampaña a tene diferente entrevista na radio i televishon. Tambe a bishitá diferente tienda, instansia, skol i akohida di mucha kaminda a parti foyeto di informashon, pega poster i saka potrèt. Tambe a interkambiá ku habitantenan. Remarkabel tabata desafionan ku habitantenan ta enfrentá i a trese dilanti na e polisnan di bario. Esaki ku e meta pa por yuda tuma akshon kaminda i na momentu ku ta nesesario. Entre otro iluminashon den barionan, ladronisia, molèster di kabritu i kachó, molèster di zonido prosedente di motosaikel, outonan ku ta kore ku velosidat haltu den áreanan habitá i molèster di trùknan ku ta transportá karga, etc. ta kai bou di desafionan aki. Bunita tambe tabata reakshonnan di habitantenan, entre otro ku awor nan ta sinti nan mas seif ku mas presensia di polis di bario i tambe ku nan sa kon i na ki momentu pa tuma kontakto.
Den e dianan benidero lo pasa den e bario di Nikiboko i besindario pa entregá foyeto na habitantenan di e bario, pa asina nan por sa di ki forma por tuma kontakto ku un polis di bario. Pronto lo klousurá e kampaña ku e polis di bario na Saba.
Ku polis di bario, Kuerpo Polisial Hulanda Karibense kier duna abo komo habitante di bo bario e sintimentu di siguridat i trankilidat pa biba. E polis di bario ke ta mas serka di bo, ke yuda pensa ku bo i ke ta atento pa kualke situashon ku por surgi. Mas presensia di polis den bario ta aportá na un mihó komunidat i un mihó Isla.
![A Klousurá Kampaña Polis Di Bario Na Boneiru 155 A Klousura Kampana Polis Di Bario Na Boneiru.09](https://www.eanews.com/wp-content/uploads/2023/05/A-klousura-kampana-Polis-di-Bario-na-Boneiru.09.jpg)
![A Klousurá Kampaña Polis Di Bario Na Boneiru 156 A Klousura Kampana Polis Di Bario Na Boneiru.08](https://www.eanews.com/wp-content/uploads/2023/05/A-klousura-kampana-Polis-di-Bario-na-Boneiru.08.jpg)
![A Klousurá Kampaña Polis Di Bario Na Boneiru 157 A Klousura Kampana Polis Di Bario Na Boneiru.07](https://www.eanews.com/wp-content/uploads/2023/05/A-klousura-kampana-Polis-di-Bario-na-Boneiru.07.jpg)
![A Klousurá Kampaña Polis Di Bario Na Boneiru 158 A Klousura Kampana Polis Di Bario Na Boneiru.06](https://www.eanews.com/wp-content/uploads/2023/05/A-klousura-kampana-Polis-di-Bario-na-Boneiru.06.jpg)
![A Klousurá Kampaña Polis Di Bario Na Boneiru 159 A Klousura Kampana Polis Di Bario Na Boneiru.05](https://www.eanews.com/wp-content/uploads/2023/05/A-klousura-kampana-Polis-di-Bario-na-Boneiru.05.jpg)
![A Klousurá Kampaña Polis Di Bario Na Boneiru 160 A Klousura Kampana Polis Di Bario Na Boneiru.04](https://www.eanews.com/wp-content/uploads/2023/05/A-klousura-kampana-Polis-di-Bario-na-Boneiru.04.jpg)
![A Klousurá Kampaña Polis Di Bario Na Boneiru 161 A Klousura Kampana Polis Di Bario Na Boneiru.03](https://www.eanews.com/wp-content/uploads/2023/05/A-klousura-kampana-Polis-di-Bario-na-Boneiru.03.jpg)
![A Klousurá Kampaña Polis Di Bario Na Boneiru 162 A Klousura Kampana Polis Di Bario Na Boneiru.02](https://www.eanews.com/wp-content/uploads/2023/05/A-klousura-kampana-Polis-di-Bario-na-Boneiru.02.jpg)
![A Klousurá Kampaña Polis Di Bario Na Boneiru 163 A Klousura Kampana Polis Di Bario Na Boneiru.01](https://www.eanews.com/wp-content/uploads/2023/05/A-klousura-kampana-Polis-di-Bario-na-Boneiru.01.jpg)
![A Klousurá Kampaña Polis Di Bario Na Boneiru 164 A Klousura Kampana Polis Di Bario Na Boneiru](https://www.eanews.com/wp-content/uploads/2023/05/A-klousura-kampana-Polis-di-Bario-na-Boneiru.jpg)