Soño cu Dios ta duna ta un soño limpi, sin envidia, orguyo of rencor, e soño cu Dios ta duna hende ta mantene hende humilde y obedecido na Dios, pa asina Dios su proposito wordo cumpli den esun cu E a manda e soño pe.
E soño cu Dios ta duna no ta contene inmoralidad, pero ta algo limpi,den cual Dios ta duna crecemento, y den cual Dios ta ricibi tur Gloria, pero e gracia di Dios tey , pasobra Dios ta sostene bo.
E soño di Dios no ta kita nada for di ningun hende, e no ta destrui un famia, pa forma otro famia , pasobra Dios ta amor y E no por contradeci su mes, pesey hende mester tene cuenta bon kico nan ta soña y haci oracion pidi Dios confirmacion di nan soño, pasobra e diabel ta un mentiroso, y e por presenta cu mentira den bo soño.
Hose ( Genesis capitulo 37 te cu capitulo 50) tabatin tin diferente soño, e tabatin 17 anja y su tata cu tabata stime hopi a cumpra un tunica di hopi color pe, cual ta nifica un tunica di autoridad. Hose su rumannan no a gusta esey.
Hose a soña cu su rumannan a buig pe, y esey por poco a coste su bida, e a wordo tira den un pos seco y despues nan a sake y bende cu e ismaelitanan asina e a resulta serca Potifar.
E a traha den cas di Potifar y e gracia di Dios tabata riba su bida y e cas di Potifar tabata florece, pasobra Hose tabata eynan.
Potifar su casa kier a seduci Hose , pero Hose a huy pa inmoralidad, pasobra e tabatin respet y temor di Dios, tambe e tabata respeta y agradecido na Potifar.
Inhustamente e a cay sera pa mas o menos 12 anja,hasta den prison e a ricibi gracia di Dios, e a bira hefe den prison pasobra Dios tabata cune , cu 28 aña e a interpreta e soño di Farao, y cu 30 aña e a wordo nombra como gobernador di Egipto, pasobra e a interpreta Farao su soño corectamente.
Wak bon tur locual e pasa aden pa e proposito di Dios wordo cumpli den su bida:
Un yamada ta bay pa tur hoben pa no descurasha, pasobra ora Dios tin algo pa bo ningun hende por kite for di bo.
No laga inmoralidad, droga, alcohol, mal amistad , politica, horta bo soño for di bo, haci bo best, studia y prepara.
Pa na e momento di Dios y den e tempo di Dios bo ta cla y dispuesto pa locual Dios tin pa bo.
Tur cos ta exigi tempo y sacrificio, no ta cu tur hende bo por comparti bo sonjo.
Tin hende ta matado di soño pa nan falta di fe y negativismo cu ta biba den nan curazon.
Hopi biaha bo por topa cu hende cu kier horta bo soño y corre bay bo dilanti y haci algo cu Dios no a manda nan haci.
Nan lo no beneficia pasobra locual Dios a yama abo pa haci,Dios mes lo duna forsa pa cumpli cune.
Tin hopi hende cu ta bisa awendia cu nan ta sabi, pero nan sabiduria ta terenal, yena cu envidia , odio y arogancia, y nan ta wordo ciega pa e enemigo.
Pero e soño cu Dios a duna bo ta bini cu su sabiduria hunto cune, pa bo sa cu ta di Dios, y lo hiba bo na e exito cu Dios kier duna bo.