Na Cede di MEP a tuma luga un charla pa splica comunidad di Aruba riba loke ta e diferencia di Onderlingeregeling,COHO y CHE cu tabata e negociacionnan cu Hulanda riba financiamento. Prome Minister Evelyn Wever Croes ta kere cu ta hopi importante pa duna e informacionnan aki den detaye. Banda di ta duna informacion , esaki ta prome biaha den historia cu gobierno kier pa pueblo sa mas di kico a ser negosha y palabra.
Sin duda na momento cu tin algo positivo y bon pa Aruba tin hopi bruhamento di tera pa mal informa e comunidad of trece insiguridad den e comunidad, pesey mes ta opta pa yega mas cerca di e ciudadano pa splica y por compronde mas kico ta loke cu Aruba a logra cu sigur ta algo hopi grandi pa e status di Aruba.
Un sala hopi yen unda cu tin diferente preguntanan cu a keda haci. Hopi hende no tabata sa hopi parti y a haci pregunta riba cada preocupacion y a ricibi contesta riba esaki tambe. Segun prome Minister Evelyn Wever Croes un pueblo bon informa ta un pueblo cu ta tuma e miho decisionnan pa su futuro.
E COHO y e onderlingeregeling tin di haber cu e condicionnan cu Hulanda a pone pa Aruba dia e la presta Aruba placa. Loke mester ta duidelijk cu Hulanda no a presta Aruba placa dies pa presta Aruba placa, Hulanda a presta Aruba placa cu e condicion cu Aruba mester trece cambionan den fundamento di Aruba pa haci Aruba mas fuerte y reciliente. Si mester bin un siguiente crisis pa Aruba no cay y kibra manera a pasa door di COVID. Segun Prome Minister Evelyn Wever Croes Hulanda kier pa Aruba para fuerte riba su pia y bira mas independiente , pero alabes kier ta sigur cu Aruba lo paga Hulanda bek.
Prome Mnister Evelyn Wever Croes ta compronde e preocupacion di Hulanda mirando cu Aruba tin un pilar economico so. Loke ta un realidad si algo mester pasa e turismo di Aruba, Aruba no por paga Hulanda e placa bek, esaki ta pone cu ta combini Hulanda pa Haci Aruba mas fuerte y reciliente yuda Aruba crea otro pilarnan economico y asina Aruba por resisti cualkier shock cu por bin.
E condicion cu Hulanda a bin cu ne cu Aruba mester reforma a keda poni den e landspakket, na momento cu a yega na acuerdo kico e landspakket ta cu ta e 8 areanan di palabracion cu lo haci pa mehora y fortifica Aruba , a bin na mesa con e reglanan di wega ta bay ta.
Segun prome Minister Evelyn Wever Croes e reglanan di wega mester ta duidelijk na mesa pa asina tin mas bista kende ta haci kico, tur esaki tabata den e COHO segun prome Minister Evelyn Wever Croes.
E COHO ta asina extremo cu Hulanda tabata kier a pone un organo cu ta consisti di tres Hulandes y nan tres ta dicidi con Aruba ta bira mas fuerte mas reciliente. Esaki ta loke cu no a sosode y cu Prome Minister Evelyn Wever Croes a logra kita riba mesa y a pone cu COHO no ta vigente pa Aruba unda cu a bin cu un onderlingeregeling.
Si dado caso e tres Hulandesnan mester a bin y nan lo mester dicidi cu mester hisa e edad di pensioen, e mester tuma luga, aki ni gobierno ni parlamento lo no tin nada di bisa. Esaki ta un situacion cu no a cay den bon tera di gobierno di Aruba. Pesey mes a subi un avion y a bay Hulanda y a laga Hulanda compronde di e situacion di Aruba y tabata bon cla cu Aruba ta compronde e regla di wega paso Hulanda ta bay yuda pa recuperacion di Aruba, pero no ta kere cu mester bay asina extremo cu otro. Di e manera aki a cuminsa cu negociacionnan y e onderlingeregeling a bin na mesa y e COHO a keda elimina.
E diferencia di e onderlingeregeling cu e COHO ta cu e onderlingeregeling tur cos ta keda den man di e gobierno di Aruba mes y e responsabilidad ta keda na e parlamento di Aruba mes y e tres Hulandes nan no lo bin Aruba mas. Esaki ta pone cu tur e prioridadnan ta keda defini pa Aruba mes. Un logro sigur positivo pa Aruba y pa progreso di tur ciudadano na Aruba y e respet entre Hulanda y Aruba tambe a keda defini.