Riba 4 di aprel último gobièrnu di Kòrsou i gobièrnu di Hulanda a firma un akuerdo mutuo, e asina yamá “Onderlinge Regeling”, ku ta regla e koperashon entre Kòrsou i Hulanda den ehekushon di pakete di pais Kòrsou (Landspakket Curaçao). E akuerdo mutuo ta menshoná tres elemento básiko ku ta guia e koperashon entre Kòrsou i Hulanda den ehekushon di e reformanan. Esakinan ta: “eigenaarschap, gelijkwaardigheid en gemeenschappelijkheid”.
Loke minister di finansa mr. drs. Silvania ta hasi no ta nada straño te pa krea tantu komoshon i krítika asina di parti di Hulanda. Minister Silvania simplemente a hasi su trabou komo minister di Kòrsou: demandá i reklamá outonomia di Kòrsou ora ta trata nos propio asuntunan. E famoso “eigenaarschap” ku ta pará den e Onderlinge Regeling.
Ta Kòrsou su Landspakket, pues ta Kòrsou mester ta doño den ehekushon di e Landspakket. Ta Kòrsou mester hasi reforma pa yega na un presupuesto balansá, un ekonomia fuerte i un aparato públiko sano i efisiente.
Aki nos ta mira e farse di e Onderlinge Regeling ku supuestamente ta un gran logro. Pa kuminsá ta papia di gelijkwaardig i no gelijkheid. Ta papia di eigenaarschap i gemeenschappelijkheid ku ta konseptonan kontradiktorio. Kòrsou ta presentá su mes komo supuesto doño di kunuku, siendo ku den praktiká di tur dia ta Hulanda ta doño di kunuku i Kòrsou su gobièrnu e fitó i Staten e union di bombanan sutadó di e pueblo di Kòrsou.
Ku masha húbilo Minister Presidente Pisas a anunsiá ku gobièrnu a kita COHO for di mesa i a yega na un areglo mutuo ku Hulanda. Un areglo mutuo kaminda Hulanda ta respetá outonomia di Kòrsou. Den e areglo mutuo aktual Parlamentu ta keda kompletamente ekskluí meskos ku tabata e kaso den COHO i den areglo mutuo ku a firma 2 di novèmber 2020. Staten di Kòrsou no por trese niun kambio ni den kontenido ni den rumbo di e landspakket.
Kontrali na e lei di COHO e Onderlinge Regeling aktual no ta ankrá den un lei di reino. Via artíkulo 38 insiso 1 di Statüt gobièrnu ku gobièrnu ta yega na un akuerdo kon e areglo mutuo ta bai funshoná. Tur asuntu propio ta keda supuestamente den man di Kòrsou i no ta bira asuntu di reino ex artíkulo 3 di Statüt .
Pero kiko nos ta mira den práktika pa loke ta funkshonamentu di e Onderlinge Regeling aktual firmá pa minprès Pisas i sra. Van Huffelen? Gobièrnu di Kòrsou no tin e mando. Ehekushon di kada reforma, proyekto i medida ta sosodé pa e instrumento nobo ku a krea yamá “Pisas-Slot”, minister presidènt di Kòrsou huntu ku minister di Binnenlandse Zaken en Koninkrijksrelaties (BZK) di Hulanda.
Den e Onderlinge Regeling nobo nan dos huntu ta forma un duo perfekto ku ta manehá tur tur kos tokante “landspakket” aki na Kòrsou. Señora Slot ta representá gobièrnu hulandes. E ta disidí na nòmber di Hulanda i e tin e saku di plaka den su man.
Den ehekushon di e “landspakket” Kòrsou ta obligá na duna Slot tur dato, tur informashon, tur selashi di Kòrsou meskos ku den COHO. Si no tin akuerdo entre Pisas ku Slot riba ehekushon di sierto reforma, medida òf proyekto aki na Kòrsou e desishon final no ta serka Pisas ku ta minister presidente di Kòrsou.
Ta nombra un mediadó pa solushoná e problema. Si Pisas ku Slot no por yega na un mediadó presidente di Korte Komun ta disidí ken ta bira e mediadó. Ketu bai órganonan hulandes ta keda dirigí nos pais.
Den e areglo mutuo aktual tambe Parlamentu a keda eliminá igual ku den COHO. Parlamentu no a partisipá den realisashon di e Landspakket i Parlamentu lo no por realisá niun kambio den e Landspakket ku aktualmente ta riba mesa.
Ta solamente Minister Presidènt Pisas i Minister Slot di BZK por kambia algu den Landspakket. Parlamentu ta haña solamente 10 dia pa tuma nota di kambio i trese opservashon I opheshon. Esei ta e úniko derechi di parlamentu. E kambio lo tuma lugá di tur manera eksaktamente manera Pisas ku Slot ke. Staten no por bisa ni stroba nada nada. Por mira klaramente ku Hulanda ta sigui imponé loke e ke pa sosedé na Kòrsou.
Ta opvio tambe ku nos polítikonan ta traha i goberná na merset di interes hulandes. Nan ta koperando ku tres punto klave ku ta deseo hulandes. Esakinan ta na promé lugá hasi Kòrsou un “stepping stone” pa nogoshi hulandes, hasi Kòrsou un base militar di NATO i yuda hasi yu di Kòrsou pober bahando nivel di bida aki na Kòrsou te na suela pa Hulanda desaroyá su ekonomia. Pasobra kapitalismo i kolonialismo ta bona ora tin pobresa.
Loke pueblonan di Kòrsou, Aruba i Sint Maarten mester realisá ta ku Hulanda su afan ta pa kontinuá ku su dominio kolonial riba su kolonianan den Caribe.
Otro elemento ku nos ta mira bek den e Onderlinge Regeling nobo ta manipulashon ku sèn, ku eksperto i ku ámtenar hulandes.
Hulanda ta duna sosten finansiero. Esaki ta enserá entre otro ku si mester di mas eksperto hulandes Hulanda ta trese nan. Si mester di ámtenar hulandes pa yuda ehekutá e “landspakket”na Kòrsou, Hulanda ta trese nan (subi “uitvoeringscapaciteit” di Kòrsou). No ta importá kuantu eksperto i ámtenar hulandes mester trese. Finalmente ámtenarnan hulandes ta pensa, krea, diseñá monitoriá i ehekutá tur medida, proyekto i reforma aki na Kòrsou. Nan lo hasi Kòrsou pida Amsterdam den Caribe. E “Onderlinge Regeling” nobo ta permití esaki.
Kada depchi hulandes ku uza pa finansiá realisashon di “landspakket Curacao”ta kai bou di kòntròl di lei hulandes ku ta Algemene Wet Bestuursrecht. Entidatnan di kòntròl propio manera SOAB i Kontrolaria General no tin outoridat.
Kousa Promé semper a ekspresá di ta kontra dominio i metementu kolonial hulandes riba Kòrsou. E problema ta ku polítikonan yu di Kòrsou ku a interiorisá kolonialismo semper lo keda alabá i adorá Hulanda i menospresiá e yu di Kòrsou meskos ku nan. Nan lo sigui hinka rudia saka man i pidi Hulanda fabor i plaka. Awor di biaha for di tempu di leinan di konsenso nos ta mira porfin sierto grado di resistensia di un mandatario yu di Kòrsou.
Minister Javier Silvania a kontestá i resistí konsehonan di CFT i TWO. E aktitut di minister Silvania ta demostrá ku e Onderlinge Regeling nobo no ta respetá outonomia di Kòrsou. E posishon di minister Silvania ta un maneho nobo òf un suseso insidental?
