Ministerio Publico a bay den apelacion den caso di 3 di e 12 sospechosonan di Avestrus.
Ministerio Publico no ta comparti e punto di vista di Huez den Prome Instancia den e casonan di e sospechosonan O.B.S., M.L.A. y P.T.A.S. y no ta de acuerdo cu e castigonan cu Huez a duna.
Ministerio Publico a exigi den Avestrus un castigo di prison incondicional di 5 aña contra ex-minister O.B.S. pa corupcion, estafa di Pais Aruba, maluso di su funcion, labamento di placa y malversacion.
Tambe Ministerio Publico a exigi pa S. wordo saca di derecho electoral pa un periodo di 10 aña.
Corte a condena S. pa un castigo di 12 luna, di cual seis luna ta condicional, pa corupcion y malversacion. El a wordo declara liber di estafa di Pais Aruba, maluso di funcion y labamento di placa. Corte a alavez sake for derecho electoral pa un periodo di 5 aña.
Contra e sospechoso M.L.A., Ministerio Publico a exigi un castigo di prison incondicional di 3 aña y un multa di 25.000 florin pa estafa di Pais Aruba, falsificacion y corupcion. El a wordo condena pa un castigo di 24 luna, di cual 12 ta condicional, un tempo di prueba di 3 aña y un multa di 50.000 florin. El a wordo declara liber di corupcion activo di e sospechoso O.B.S. y di falsificacion.
E sospechoso P.T.A.S., anteriormente ambtenaar di DOW, a wordo condena den Prome Instancia pa un castigo di 2 aña, di cual 1 ta condicional, pa corupcion y labamento di placa. El a wordo declara liber parcialmente di corupcion activo di e minister.
Mescos cu M.L.A. Corte a impone un condicion particular riba dje cu e no por pidi of haya optie riba erfpacht comercial pa un periodo di 3 aña. Corte a dicta ademas cerca e sospechoso P.T.A.S. cu e suma di 1.3 miyon dollar cu a wordo confisca, a wordo verbeurd verklaard. Ministerio Publico a exigi un castigo incondicional di 4 aña contra e sospechoso aki den Prome Instancia.
Ministerio Publico lo no apela e sentencianan di e otro sospechosonan. Pa mas leu conoci na Ministerio Publico na e momento aki, e siguiente sospechonan a bay nan mes tambe den apelacion, esta: O.B.S., M.L.A. y P.T.A.S. (Ministerio Publico tambe a apela) y C.R.M., E.R.W., N.D.N. y C.D.H.
