Bon dia yen di alegria ! Shonnan tur, un bon dia colma di salud, alegria y sabiduria. Nos ta sigui duna danki na Bon Dios pa tur bendicion. Manera nos ta bisa regularmente, cada ken cu su mesun consenshi y cada ken cu su mesun cancion. Tin algun cu parce no tin consenshi, pero, tardi of tempran e tambe lo tin cu duna cuenta. Karma ta bini pa tur. Locual bo sembra bo ta cosecha, sea ta algo negativo of positivo. Hasi bon anto, pa bon bin bek pa bo y no abusa di otronan bondad y generosidad. Mi ta kere, cu ainda Lady Ruth ta inspira pa e 100 canticanan na nos dushi idioma Papiamento di mas scucha y gusta, cu a causa hopi furor den e programa special di Oldies 99.9 en conekshon cu Dia di Hymno y bandera luna pasa, pero cu tanto relatonan social y cultural cu nos tin, ta te awor nos por comparti algo di esaki. Nan a toca e 100 canticanan na Papiamento di mas bunita y pueblo amante di bon musica cu ta di nos mes, a goza masha hopi mes. Unda cu bo por tawata, bo por a scucha hasta den auto tambe. Ata aki e prome 5 nan mas bunita den e programa cultural aki : 1. Jossy Brokke – Pais. 2. Boy Thode – Maske bo no ke mi mas. 3. Sasha Figueroa – Pa semper bo te’sun. ( I will always love you ). 4 .Ced Ride – Mi no ke bo mas. 5. Leslie Vos – Destino ( Let’s keep it that way ). Den e Top 10 di Wals nos ta anuncia e prome 3 nan cu ta : 1. Padu del Caribe – Abo so. 2.Don Ramon Krozendijk – Cunucu di seit. 3. Hortance Sarmaat & Hubert Hernandez & Trio – Felicidad. Ki bunita lo ta tambe, Radio Galactica su programa di Hulandes cu ta canta Ingles, Diadomingo venidero, en conekshon cu Dia di Rey dia 27 di April, pero nan programa lo ta Diadomingo dia 30 di April. Studiantenan cu a studia na Hulanda, nos dushi hendenan cu a yega di biba na Hulanda sigur conose hopi di e canticanan ey y lo recorda nan bunita recuerdonan na nos madre patria. Galactica FM ta hopi conosi pa su programa “Memories” di tur atardi 5 pa 7 pm, companjando bo di trabao pa cas cu canticanan relahante bunita y riba Diadomingo di 5 pa 8 pm nan programa Oldies 99.9 cu Joe Hernandez, Tico Bee y Rowald Webb. Pero tambe pa demas programanan cu cancionnan local, e.o. den e programa den oranan di mainta cu Robert Thiel ariba wiel. Lady Ruth a yega di forma parti di nan team hopi anja pasa, den noticiero hunto cu e bunita y simpatico Freda Maduro.
Nos ta dorna nos relato di awe cu algun bunita pics di amiganan cu ta canta nan mesun bunita cancion den bida cu salud, alegria y sabiduria. Y mas cu claro, e picsnan di dos di e presentadornan di e programanan bunita na Radio Galactica 99.9 FM situa den curason di Dakota, na unda nos ta un bario manera Nacionnan Uni cu hendenan dushi di tur parti cu nan mesun cultura y amor pa e cultura di Aruba cu a bira nan di dos cas. Nos ta stima nos hendenan di Dakota, e.o. famia Yolanda Winklaar , Panaderia del Pueblo y Toko Dakota y famia di Hong di Dakota Take Away situa net na banda patras di Panaderia del Pueblo. Ta famianan cu ta traha duro y hasi bida mas facil pa nos dakoteronan di Dakota tur dia cu nan excelente productonan y excelente servicio. Danki lieve mensen ! Y danki pa boso cu ta lesa cu atencion di curason. Pasa un dushi Dia di Rey y tambe un dushi Dia na Marinierskazerne 1 di Mei na Savaneta, cu , segun nos a comprende, lo habri nan porta atrobe pa pueblo bin conose nan di serca den nan servicio militar. Cuida curpa, “stay safe y love you too “!.
