A duna relato di Aruba su cambionan fiscal desde Status Aparte te cu aña 2023
Dialuna mainta Minister di Finansa y Cultura Xiomara Maduro tabata presente na Universidad di Aruba pa atende e simposio ‘E Futuro di Fiscalidad den e Parti Caribense di Reino’ organisa pa Corte Comun di Husticia na ocasion di despedida di Hues den casonan fiscal mr. Mari de Werd. Minister President Evelyn Wever-Croes a hiba palabra y a repasa tur e trabaonan cu pais Aruba a haci riba e tereno fiscal desde cu nos a haya Status Aparte, desde aña 1986 te cu awo na aña 2023 pa Aruba por yega na un sistema fiscal simpel, husto y sostenibel.
Cambionan fiscal desde Status Aparte na Aruba
Diferente Gobierno di Aruba a percura pa aboli ‘tax holidays,’ aboli companianan ‘offshore,’ aboli ‘Aruba Vrijgestelde Vennootschap AVV’, y a introduci companinan mas transparente. Esaki tabata necesario pa Aruba por a cumpli cu standardnan fiscal internacional pa evita di wordo nombra den listanan preto y shinishi. Desde comienso a cuminsa traha pa baha e peso fiscal di directo pa indirecto, asina a cuminsa na introduci BBO na aña 2007. Na 2015 a introduci BAZV y e VAS pa asina declara winstbelasting na forma adelanta. Ta cambionan cu a yuda fortifica e finansa publico di Aruba. Na aña 2017 a sigui reforma y simplifica e sistema fiscal di Aruba y asina na aña 2019 a cuminsa na baha impuestonan personal y di negoshi. A introduci ‘sin taxes’ den cual a subi e tarifanan riba bebida alcoholico y tabaco. A diferencia tambe e cobransa di ‘grondbelasting’ pa baha e peso fiscal di e impuesto aki riba e ciudadano comun y aumenta esaki pa viviendanan di balor grandi. Pareu cu esaki a duna compensacion tambe door di rebaha e prima di AZV pa pensionado. Riba e tereno di impuesto personal, a subi e suma liber di impuesto y di e manera ey 30 mil persona incluso hopi pensionado no mester paga impuesto riba nan entrada. A baha tambe e tarifanan di impuesto riba entrada y a hisa pensioen di biehes y salario minimo. A aboli tambe e successiebelasting. Durante e pandemia di COVID-19 den aña 2020 y 2021, Gobierno a introduci Alivio Fiscal 1 y 2 den cual a flexibilisa impuesto pa asina por a surpasa e pandemia.
Na aña 2022 a traha pa elimina BBO y introduci BTW, pero debi na e inflacion induci pa e pandemia di COVID-19 y e guera cu Oekraina a dicidi pa pospone esaki te ora e situacion inflatorio por mengua. Como alternativa a introduci e Plan di Impuesto 2023 den cual a subi e tarifa di BBO na 7% y a duna compensacion door di subi e suma liber di impuesto na 30 mil florin, a baha impuesto riba entrada, a subi e ‘reparatietoeslag’ pa e grandinan, a separa e cobransa di impuesto di pensionado di AOV, a subi pensioen di biehes y a subi minimunloon. Pa comercio a baha impuesto riba ganashi y a hisa e ‘investeringsaftrek.’ Den e Plan di Impuesto 2023 a aboli e incentiva fiscal pa hotel IPC, a limita e depreciacion riba propiedad, a introduci salario usual, a limita prestamo den propio negoshi y a hisa e suma di e Areglo pa Negoshi Chikito KOR. Den e Plan di Impuesto 2023 ta cuminsa traha tambe riba e reforma den e sector turistico, a hisa e ‘toeristenheffing’ y a cambia e reparticion di e fondonan genera. Como ultimo parti di e Plan di Impuesto 2023, ta introduci cobransa di BBO na frontera y ta simplifica e tarifanan di impuesto riba importacion. E Plan di Impuesto 2023 ta yuda pa logra surplus den presupuesto cu ta hiba Aruba su finansa publico den e direccion di sostenibilidad.
Minister Maduro ta gradici Minister President pa su discurso elocuente y ta gradici mr. Mauritsz de Kort Presidente di Corte Comun di Husticia pa e invitacion y pa organisa un simposio unda fiscalistanan por a dialoga y comparti nan experiencia cu otro.
