Durante e reunion di Konseho Insular ku tabata riba agènda dia 18 di aprel 2023 a instalá e partnernan di koalishon UPB i MPB komo Kolegio Ehekutivo. E partnernan di koalishon a entregá un petishon pa esaki dia 12 di aprel 2023.
Den e petishon akí nan ta referí na e akuerdo di koalishon ku ta inkluí e ambishon di gobernashon pa den kuadro di desaroyo duradero di Boneiru, sòru pa un kambio positivo notabel pa habitantenan di Boneiru. I pa medio di ehersé bon gobernashon na un manera korekto, logra efektividat i efisiensia den e trabounan ku mester ehekutá. Ademas bon gobernashon i gobernashon korekto ta enfoká riba resultado i ta komuniká den un forma responsivo, demostrando integridat i stabilidat.
Ku instalashon di e Kolegio Ehekutivo nobo, Elvis Tjin Asjoe kende tabata diputado pa MPB ta baha. Pa UPB diputado James Kroon i diputado Jolinda Duncan-Craane i pa MPB diputado Hennyson Thielman ta drenta e Kolegio Ehekutivo nobo. Durante e promé reunion di Kolegio Ehekutivo lo stipulá i publiká e repartishon di kartera.
