Dia 12 di aprel, Sekretario General suplente di ministerio di Asuntunan Ekonómiko i Klimat, Gerdine Keijzer-Baldé, a bishitá Boneiru pa diskutí desaroyonan riba tereno di suministro di energía. Durante su bishita, el a papia ku gezaghèber Edison Rijna i miembronan di kabinèt Hennyson Thielman i Jolinda Craane tokante e nesesidat di un almasenamentu sigur di kumbustibel i ekspanshon di energía duradero.
Un tópiko importante di e diskushon tabata e konstrukshon di tankenan nobo pa almasená kumbustibel i garantisá un depósito sigur. E tankenan aktual no ta kumpli mas ku reglanan i leinan. E tankenan nobo ta wordu konstruí na sur di aeropuerto, pa por sera abastesé via e pier eksistente.
Paralelamente ku e konstrukshon di e tankenan nesesario pa almasená kumbustibel, ta trahando riba ekspanshon di energía duradero. Keijzer-Baldé a bishitá e tereno di Contour Global na nòrt di Boneiru, unda aktualmente ta konstruí un parke solar nobo. Apart for di panelnan pa genera energía, ta bini tambe un bateria pa almasená e energía aki. Lo por sperá ku e parke solar nobo aki ta kuminsá traha den e luna di september di e aña aki. Además, a diskutí e plan pa ekspanshon i renobashon di e park eóliko aktual.
E invershon pa e depósito nobo di kumbustibel ta wordu hasi dor di Bonaire Brandstof Terminals (BBT), establesé dor di ministerio di EZK. Via BBT, tambe ta wordu invershá den e parke solar nobo i e park eóliko mas grandi pa futuro.
Gezaghèber Rijna ta kontentu ku e atenshon ku ta duna pa e desaroyo riba tereno di suministro di energía pa Boneiru. Tur parti ta wak e importansia di ekspanshon i desaroyo di energia duradero pa Boneiru, spesialmente mirando e kresementu di poblashon i e kresiente demanda pa energía.
