E partijraad di AVP dialuna anochi, a laga e resultado cu tur hende tabata spera. Un grupo grandi cu tal sigui apoya Benny Sevinger, mientras cu por lo menos dos candidato disgusta.
E tabata un reunión basta largo na unda tabata invita candidatonan riba lista di AVP, lidernan di campaña, etc., pa discuti kico tabata e paso pa tuma den e situacion di Benny Sevinger. E reunión aki tabata pa duna e fracción di AVP den Parlamento un bista di kico ta e paso cu nan mester tuma. Sea ta keda cu Sevinger of ta pidie entrega su asiento.
Cu hopi hende pafo ta warda e resultado, paden e reunion tabata cayente unda cu e mayoria mester a convence e minoria pakico ta sigui sostene Sevinger. Un man yen di candidato tabatin nan obheccion y a splica pakico y a wordo splica cu ta mira e resultado di Corte y analisando esaki ta kere cu den apelacion Sevinger tin chens grandi pa keda liber di tur e acusacionnan.
Na momento cu a cuminsa vota na fabor, e Parlamentario do Nascimento a lanta para bisando “te aki mi a yega cu partido” y a bandona sala prome cu e resultado final. A menciona hopi cu Gerlien Croes tabata na banda di Rycond Santos do Nascimento. Sinembargo e no a bandona sala pero no kier a duna comentario ainda e momento ey.
Awe mainta Santos do Nascimento lo tene un conferencia di prensa y lo informa si e ta declara su mes independiente of ta entrega e asiento cu el a haya como candidato di AVP, lograndi 215 voto. Hopi menos cu otronan di e partido pero cu si a keda for di Parlamento.