Tourism Corporation Bonaire (TCB) a anunsiá lansamentu di su kampaña nobo ‘Bonaire Friends – Amigu di Boneiru’ ku tin komo meta pa rekonosé i selebrá e personanan ku ta traha asina duru pa hasi e eksperensia Boneiru posibel. Intenshon di e kampaña ta pa fiha atenshon riba e tremendo servisio ku nos hendenan lokal ku ta traha den sektor turístiko ta duna, i pa gradisí nan pa nan esfuersonan.
Komo parti di e kampaña Bonaire Friends ta invitá bishitantenan pa komparti nan storianan tokante nos hendenan lokal ku a yuda nan optené eksperensianan nobo i ku a rekomendá restorantnan fantástiko òf ku djis tabat’ei na e momentu korekto pa ofresé nan e ayudo ku nan tabatin mester. Pa partisipá bishitantenan por manda nan storianan, nan potrètnan òf nan videonan riba e página spesial di Bonaire Friends riba www.BonaireIsland.com.
Tur siman TCB ta selektá e mihó 3 te 5 storia-, potrèt- òf videonan i Bonaire Friends Review Committee ku ta konsistí di miembronan di TCB i Bonaire Hotel and Tourism Association (BONHATA) ta evaluá nan. Ta evaluá e storia-, potrèt- òf videonan a base di e karakter úniko di esakinan i e pashon ku nos habitantenan ta demostrá. E ganadó ta haña un rekompensa i un invitashon pa ofisialmente bira un Bonaire Friend, un Amigu di Boneiru.
‘Nos ta super entusiasmá ku nos por lansa Bonaire Friends. Nos balor mas grandi komo destinashon ta nos hendenan, nos komunidat i e proyekto akí lo duna honor i pone énfasis riba nos embahadornan mas importante i nan trabou duru pa krea i ofresé e Eksperensia Boneiru. It’s in our nature i esaki lo bira asta más mihó ainda si nos rekompensá nos hendenan pa nan servisio. Bonaire Friends ta un parti integral di nos strategia turístiko’, segun Miles B M Mercera, direktor di TCB.
E kampaña di Bonaire Friends ta un oportunidat fantástiko pa mustra e karakter kalor i e hospitalidat di nos hendenan na Boneiru i pa gradisí nan pa nan esfuersonan pa laga nos bishitantenan sinti nan mes na kas.
TCB ta enkurashá tur partner lokal pa partisipá na esaki pa medio di enbolbí e hendenan ku ta traha na nan empresa serka e proyekto akí i pa sostené e kampaña i pone medionan disponibel pa yuda promové esaki. Ku e kampaña akí TCB ta spera di krea un impakto positivo serka nos komunidat lokal i mehorá e eksperensia di nos bishitantenan na nos isla.
