Mucha cu ta bira miembro di biblioteca hubenil den proximo dianan ta haya un pakete di 3 wega regalo. Y ademas e miembrecia ta gratis! Artista Steffen Maas a crea y a produci e weganan pa muchanan di Aruba. Den un pakete tin un wega di Domino pa mucha di 3 aña bay ariba, un wega di memory pa mucha di 4 aña bay ariba y un wega di kwartet pa mucha di 6 aña bay ariba.
E imahennan di e wega ta e mesun cu Steffen Maas a publica den ‘Mi buki di Aruba’. Mi buki di Aruba ta ofrece muchanan di Aruba imahennan reconocibel di nan mes contexto cultural y medio ambiente.
E weganan ta ofrece imahen riba diferente topico, manera cuminda y custumber di Aruba, naturalesa y paisahe di Aruba. E wega ‘ArubABC’ ta mustra varios parha, fruta, mata, instrumento musical, sitionan y monumentonan conoci di Aruba. E material ta masha colorido y atractivo. Mucha ta reconoce e imahennan facil y alabes ta siña lesa leter, e palabra of nomber.
Steffen Maas a crea e weganan enfocando riba mucha mas jong cu ta siña lesa, pero por usa e weganan pa mucha di tur edad y tambe den klas.