Directie Ouderenzaken, bou encarga di Minister Ursell Arends, y Club Kibrahacha 60+ ta lansa e Telefon pa Adulto Mayor, un servicio nobo pa brinda sosten na esnan riba 60 aña di edad cu ta experiencia soledad. Maneha door di Club Kibrahacha, e liña di telefon 125 ta atende cu yamada pa desminui sentimento di isolacion.
Segun nos poblacion ta bai bira mas bieu, e problema di isolacion social den e grupo di hende di tercera edad ta bira mas prevalente. Estudionan a mustra cu isolacion social por tin un impacto negativo riba salud mental y fisico di un persona, cu por hiba na depresion, ansiedad, y otro problemanan di salud. Telefon pa Adulto Mayor ta purba combati e problema ki dor di brinda un compania.
E servicio ta disponibel pa cuakier persona cu tin mas di 60 aña y ta buscando compania. E persona cu yama por papia cu boluntarionan cu ta entrena y cu t’ey pa brinda sosten y un orea pa tende. E servicio ta disponibel na Papiamento y e ta gratis.
“Nos ta compronde ku hopi hende di tercera edad por sinti nan mes isola, y nos kier yuda nan sinti nan mes mas conecta cu nan comunidad,” a bisa Lenny Geervliet, cu ta maneha e proyecto di Telefon pa Adulto Mayor. “Nos servicio ta diseña pa brinda compania y sosten na esnan cu ta mester mas di dje. Nos kier demostra cu dor di duna un orea pa tende, nos por haci un diferencia real den e bida di hopi persona.”
Telefon pa adulto mayor ta un liña di telefon cu un number facil, 125, cu adultonan mayor na Aruba por yama. E servicio ta disponibel di dialuna pa diabierna di 8.30AM pa 12.00 PM, cu e meta di ta disponibel 7 dia pa siman.
Telefon pa adulto mayor ta un parti di e Proyecto: “Mi ta inclui” di Club Kibrahacha 60+ en colaboracion cu Directie Ouderenzaken. E meta di e proyecto ta pa combati y preveni isolacion y soledad bou di adultonan mayor na Aruba. Pa mas informacon tocante Telefon pa Adulto Mayor, por bishita www.mitainclui.aw of por bishita nan pagina di Facebook of Instagram “Yama 125 Mi ta inclui”
