Corte den prome instancia a cera awe e tratamento di e caso penal contra cuatro sospechoso cu ta wordo acusa di a comete violencia den publico. Ta trata aki di Y.T.M. (22 aña) y K.H.W. (27 aña) y e rumannan N.R.W.W. (33 aña) y A.C.D.W. (34 aña).
E sospechosonan aki ta wordo acusa di a usa violencia den Azia Restaurant na Palmbeach riba 14 di november 2021, caminda a tira cu stul, boter y glas y a causa destruccion den e establecimento hopi bishita aki. E sospechoso T.M. ta wordo ademas acusa di a herida un trahador di e restaurante seriamente cu un boter.
Ministerio Publico a exigi contra e sospechoso T.M. 230 ora di trabao pa comunidad plus un castigo di prison condicional di 3 luna cu un tempo di prueba di 2 aña.
Contra e sospechoso N.W. fiscal di husticia a exigi 176 ora di trabao pa comunidad y un castigo di prison condicional di 1 luna mas 2 aña di tempo di prueba y contra e sospechosonan K.W. y A.W. 148 ora di trabao pa comunidad y 1 luna di castigo di prison condicional plus 2 aña di tempo di prueba.
Fiscal di husticia a enfatiza den su rekisitorio cu e caso aki, cu ta conoci como ‘Flor’, tabatin gran impacto riba comunidad y por a resulta hopi malo pa e imagen di Aruba como destinacion turistico safe. E restaurant ta keda cerca di e asina yama highrise hotels y tabata sirbiendo na e momento ey tanto huespednan turista como localnan. E pelea a hiba na caos y panico bao di e huespednan, bao di cual tabatin tambe muchanan. Fiscal a bisa awe cu ta un milagro cu no a cay mas herido e anochi ey.
Huez lo dicta sentencia riba 21 di april venidero.
