Minister di Hustisia sr. Shalten Hato konhuntamente ku Kuerpo Polisial di Kòrsou a presentá e relato anual pa lokual ta regardá e sifranan di kriminalidat pa anja 2022. Aki ta sigui un sinópsis di e sifranan di e konklushonnan di e sifranan di kriminalidat di aña 2022.
-Den 2022 Kòrsou a konosé 8 asesinato kual ta e sifra mas abou den e último 20 añanan.
-Den 2022 Kòrsou a konosé 168 atrako kual ta un bahada di mas ku 50% kompará ku 2021.
-E ta mustra tambe ku mas o menos 18% di atrako ku a tuma lugá aña pasa tabata riba turista i 82% tabata riba personanan lokal.
-Pa loke ta trata atrako a detené 80 persona den aña 2022 di kual 72 ta yu di Korsou. Esaki kontrario na e persepshon ku ta indokumentadonan prosedente di Venezuela ta kometé atrako na gran eskala.
-Den 2022, Kuerpo Polisial a konfiská un total di 74 arma di kandela ilegal.
-Ladronisia di outo a baha den 2022 ku mas ku 40% kompará ku 2021.
-Pa loke ta regardá ladronisia di outo a detené un total di 48 persona den 2022.
-Regardando ‘’zedenzaken’’ tabatin 39 denunsia den 2022 kual a kondusí na un total di 30 detenshon.
-Manera ya ta ampliamente konosí violensha domestiko a subi den 2022 ku kasi 40% sumando na un total di 107 kaso. Den kuadro di esakinan a detené un total di 120 persona.
-Kiebro den bibienda i na negoshi tambe a konosé un subida chikitu den 2022 kompará ku 2021 i pa ku esakinan a detené 47 persona.
-Den 2022 e mortonan den tráfiko a konosé a subi di 10 bai 26 kompará ku 2021. Nos tabatin un kantidat astronómiko di aksidente di tráfiko i varios ku konsekuensia fatal. E gran mayoria tabata kousá pa ekseso di velosidat.
E bahamentu den kriminalidat aki por wòrdu atribuí na e asina yama ‘’informatie gestuurd werken’’ kaminda ta huza kompilashon di data pa aktua ne momento i kaminda tin mester. Minister Hato ta aploudí e bon trabou di Kuerpo Polisial i Ministerio Públiko pa loke ta trata mantenshon di orden públiko den 2022 i ta komprometé su mes pa sigui traha pa mitigá kriminalidat den aña 2023.
