Siman pasa a tuma luga e conferencia tocante awa “UN Water Conference 2023”, organisa door di Hulanda y Takijistan. Prome Minister Evelyn Wever – Croes y Minister Ursell Arends a atende e conferencia aki, caminda cu a elabora riba e importancia di awa pa Aruba y tur esfuerso cu Aruba ta haci den cuadro di esaki. E siman aki durante Conferencia di Prensa di Gobierno Prome Minister a elabora riba con e conferencia a bay.
Aruba tin bon calidad di awa potabel y tur hende tin acceso na awa pa bebe, cual ta algo cu hopi pais no tin. Prome Minister Wever – Croes a duna di conoce cu esaki ta un compromiso cu a reitera, pues lo percura pa tin awa accesibel pa tur hende. Ademas, hecho ta cu Aruba ta rondona di lama cual ta importante pa nos pilar economico cual ta turismo. Sinembargo, ta tuma nota cu tin pais cu no ta tuma esaki na serio y consecuentemente ta mira hopi polusion den awa cual no ta wordo ocasiona na Aruba, pero ta laba bin riba nos beachnan. Esaki ta un punto cu a para keto na dje durante e conferencia.
Prome Minister Wever – Croes a splica tambe cu ta reconoce cu tin trabou pa haci ainda na Aruba pa loke ta situacion di awa. Un di e retonan aki ta cu e planta di purificacion di awa sushi / Rioolwaterzuiveringsinstallatie (RWZI). Minister Glenbert Croes y Minister Ursell Arends ta atendiendo cu privatisacion di e planta pa asina por pone mas inversion y mihor atencion na dje. Un otro reto cu a wordo treci dilanti den e conferencia ta cu na Aruba, falta un maneho pa captura awa di yobida cual actualmente no ta tuma luga optimalmente.
Prome Minister a agrega bisando cu Minister Ursell Arends a haci un tremendo papel den representa Aruba y su compromisonan y Aruba a saca cara den esaki.
Apart di a representa Aruba na e conferencia, Prome Minister Wever – Croes tabatin e encargo di Presidente ex Officio di e conferencia, cual kiermen guia y presidi e conferencia na cierto momentonan durante e tres dianan. Esaki ta un gran honor pa Aruba, di por ta riba e tarima di mas halto na Nacionnan Uni y haya e reconocimento di paisnan grandi y mas poderoso na mundo.
Finalisando, Prome Minister a expresa cu Aruba a haci un tremendo papel durante e conferencia y aworaki mundo tambe ta mira cu Aruba ta tuma e cosnan aki na serio. Ta bunita pa mira e gradicimento y reconocimento cu ta bin di otro paisnanan, pa loke ta e trabounan grandi cu a haci na Aruba.
‘E tabata un bon conferencia y esnan cu a organise a haci un bon trabou cu esaki. Mi a bin bek cu un curason mas trankil mirando cu otro paisan tambe ta realisa e importancia di awa, mescos cu nos ta reconoce akinan na Aruba. Cual ta duna un poco mas espacio pa sigui traha pa e pueblo di Aruba.’