Hunto cu Minister di Finansas,
“Mi ta duna hopi reconocemento na Secretario di Estado Alexandra Van Huffelen pa yuda yega na e acuerdo aki”
Diahuebs mainta den conferencia di prensa di Gobierno di Aruba, Prome Minister Evelyn Wever-Croes a anuncia cu e onderling regeling lo wordo firma diamars awo, dia 4 di april na Hulanda. Diahuebs atardi, Prome Minister a informa Parlamento di e ultimo detayenan.
Prome Minister a indica cu lo bay tin un conferencia di prensa despues na Hulanda pa informa comunidad henter di Reino di kico tur a yega na dje den e onderlinge regeling.
“Mi ta considera esaki un paso grandi y mi ta duna hopi reconocemento na Secretario di Estado Alexandra Van Huffelen cu a duna oido pa scucha kico ta biba den e paisnan y cu tabata dispuesto pa nos a yega na otro acuerdo asina hunto cu Corsou y Sint Maarten. E paso grandi aki ta trece trankilidad, un sistema di traha cu nos por biba cu n’e y nos ta sumamente orguyoso di a yega asina leu”, Prome Minsiter a expresa.
Prome Minister a remarca tambe cu pa Aruba, otro siman tambe lo wordo trata e Rijkswet di Financieel Toezicht, e Raft cu ta e otro ley di Reino cu ainda ta riba mesa. Hulanda ta sigui insisti cu esaki ta importante pa nan, di banda di Aruba, Parlamento a indica cu nan no ta sostene e bachi di Rijkswet y den esey Aruba ta negociando na mesa. Pa e motibo aki tambe, Minister di Finansas Xiomara Maduro tambe lo viaha hunto cu Prome Minister pa Hulanda y cu e prefesionalnan pa e negociacionnan aki. “Cu poder di Dios nos ta sali afo mas lihe cu ta posibel”, Prome Minister a expresa.
Raft no ta para riba su mes, nan ta acopla cu e discucionnan riba e repago di e debe cu nos tin na Hulanda. Aruba debe Hulanda 916 miyon florin cu ta caduca e aña aki na october. “Mirando cu nos no tin e suma aki, nos lo mester yega na un areglo di pago cu Hulanda riba esey y basa riba esaki e reunionann ta tuma luga. Nos lo mantene comunidad informa riba esaki”, Prome Minister Evelyn Wever-Croes a duna di conoce.
