Den comunidad e tema di abuso sexual di muchanan ta un tema hopi sensitivo y importante. Ultimo añanan esaki a haya hopi atencion, cual sigur ta hustifica. Mirando cu esaki tambe tin mi atencion debido, mi ta informa mi mes periodicamente riba e ultimo desaroyonan cu ta tumando lugar riba e tema aki. Pesey, algun siman pasa mi a haci un serie di 10 pregunta na minister di Husticia y Asuntonan Social sr. Rocco Tjon, pa dunami un “update” riba e desaroyonan di Family Justice Center (FJC). Un di e preguntanan aki ta: “Minister, den cuadro di ayudo pa muchanan cu ta wordo abusa, por duna un update kico ta pasando cu Family Justice Center y con e desaroyonan ta tumando forma eynan? Minister su contesta riba e tema tabata lo siguiente:
- Family Justice Center ta trahando desde 2021 pa logra su propio edificio. Mientras tanto e vision ta pa sigui promove pa instancianan hudicial, medico y social traha mas cerca di otro. E meta ta pa ofrece ayudo y un servicio mucho mas mihor y mas completo cu ta posibel na victimanan di abuso sexual y violencia relacional fisico severo.
- Ta preparando y ekipando e cadena hudicial, social y medico pa mehora e servicionan na e victimanan. Den transcurso di aña pasa a organisa e training “kinderverhoor” pa e personal di JZP y tres psicologo cu ta sostene JZP den casonan mas dificil y tambe den preparacion di menornan pa e verhoor. Banda di esaki a aumenta e cantidad di di rechercheurs na JZP pa nan tin un ekipo completo a base di nan formatie rapport. Ademas a obtene tur material elctronico pa por instala esakinan den e verhoorruimte di JZP.
- Hunto cu DVG a logra pa Aruba tin su propio docter specialisando desde Maart 2022 pa bira medico forensico pa Aruba. Mientras tanto ya Aruba conoce su prome docter forensico contrata for di Hulanda desde 1 di December 2022! E desaroyo aki tin bentahanan y un logro grandi pa cu e cadena hudicial, social y medico.
- A logra contactonan y ta canando e caminda pa por bin cu e opleiding di recherche psycholoog pa tanto Aruba como e otro islanan di Reino.
- A organisa tambe un E-learning training di AUGEO foundation pa 150 profesionalnan riba tereno medico, e training ta specificamente riba e area medico y ta trata e temanan entre otro; “reconoce señalnan di maltrato cerca pashentnan” y “con pa dirigi combersacionnan complica ora di preocupacionan pa cu señalnan di abuso/maltrato di como menor of adulto.”
- A firma un MOU cu European Family Justice Center y gobierno di Boneiro den cuadro di colaboracion pa ambos Family Justice Center.
Asina mi lo sigui controla gobierno y pidi alaves informacion riba e tema di abuso sexual contra nos muchanan. Gobierno ta logrando pasonan grandi den e e area aki y asina ta segurando pueblo cu ta haciendo un trabao grandi pa proteha esnan mas vulnerabel den nos sociedad.
Si pueblo desea mas informacion di e articulo aki, contact mi na tel: 528-4639 of email mi na: marco.berlis@parlamento.aw / Bo parlamentario y sirbidor di pueblo na bo ordo semper!