Aruba, manera hopi otro isla chikito, ta enfrenta un set di reto interrelaciona cu ta pone su economia, su pueblo, y su medio ambiente na peliger. Esaki ta inclui reduccion di crecemento economico, reduccion di poder di compra, destruccion di naturalesa, shock di inflacion, restriccion di espacio.
Pa enfrenta e retonan aki, tin un urgencia pa adopta un modelo economico nobo cu ta inclusivo y sostenibel. Riba diahuebs 30 di maart Minister di Asuntonan Economico, Geoffrey Wever, lo ta den parlamento pa un Openbare Bijeenkomst pa asina sigui fortifica puntonan di accion pa ser implementa entre 2023 – 2025.
Aunke e economia di nos isla a crece nominal e ultimo decadanan – e mesun nivel di crecemento no a ser sinti pa e ciudadano comun, esta crecemento economico real. Un continuacion di crecemento manera e ultimo añanan no lo converti den e mesun crecemento economico real pa e ciudadando general.
Na mes momento, nos isla ta enfrentando un reto medio-ambiental cu ta pone nos recursonan natural y biodiversidad na peliger. Destruccion, contaminacion, y mal-uzo di naturalesa tin un impacto significante riba e ecosistema fragil di nos isla.
Inflacion mundial tambe ta sigui aumenta, y esaki ta trece cune un aumento di prijs pa producto y servicio, cu ta reduci poder di compra di nos localnan. Nos dependencia tin un impacto significante riba economia di e isla, e consumidor su poder di compra, y e rendabilidad di companianan.
Como pais nos mester enfatisa riba e transicion. Un modelo economico nobo pa diversifica economia, reduci dependencia, y promove desaroyo di industrianan nobo. Cu e plan di accion 2023-2025 lo cuminsa implementa proyectonan inmediatamente pa kick-start e transicion sostenibel, y brinda solucionnan duradero mas pronto posibel pa e varios retonan cu Aruba tin y lo enfrenta.
