Supervishon i Mantenshon ta intensifikando kumplimentu ku lei pa loke ta trata konstrukshon duradero na kosta. Resientemente den un di e dosiénan a imponé un di dos multa. Ademas di imponé e di dos multa akí na e sitio en kuestion, e simannan ku ta bini Supervishon i Mantenshon ta bai bishitá algun lugá pa inspekshon tokante kumplimentu ku lei na konstrukshon duradero na kosta. A informá esnan ku tin e pèrmitnan konserní tokante esaki ku karta.
Konstrukshon duradero na kosta ta un parti importante pa desaroyo duradero di Boneiru, asina kontrarestá e influensianan negativo riba e ekosistemanan sensitivo. Esaki ta un prioridat pa Boneiru, tantu riba e tereno di naturalesa komo di ekonomia. P’esei tambe e ta stipulá den e programa di ehekushon di Supervishon i Mantenshon komo un di e prioridatnan. Ta asina ku refnan di koral ta forma un kibrasla natural dilanti di kosta i banda di esei un di e atrakshonnan turístiko mas grandi di Boneiru. Ta un pilá importante bou di ekonomia di Boneiru. Ta naturalesa vulnerabel ku nos mester i ke protehá.
Ta na interes di Boneiru, ku ta krese i kambia rápidamente, pa dirigí e desaroyonan den bon direkshon. Ta benefisiá Boneiru ku Entidat Públiko Boneiru huntu ku partidonan manera STINAPA ta vigilá mantenshon di lei i ta pèrkurá ku ta kumpli ku esaki.