Corte den Prome Instancia a dicta sentencia awe den e caso contra ex-parlamentario A.A.H.,
voorzitter di POR (Pueblo Orguyoso y Respeta), y contra J.D.v.P., penningmeester di e partido.
H. a wordo condena pa un castigo di prison di 24 luna, di cual 6 luna ta condicional y un tempo
di prueba di 3 aña pa desfalco di Afl. 195.404 en total di placa di Pais Aruba, pa estafa y
falsificacion. Ademas el a wordo condena pa paga un multa di Afl. 35.000. E suma di Afl. 15.000
cu a wordo tuma den beslag cerca dje na inicio di e caso, a wordo declara verbeurd.
E sospechoso V.P. a wordo condena pa un multa di Afl. 1000 y 120 ora di trabao pa comunidad
condicional.
Fiscal di Husticia a exigi anteriormente contra H. un castigo di prison di 24 luna mas un multa.
Contra e sospechoso V.P. e exigencia tabata un castigo di trabao di 200 ora plus 3 luna
condicional y un tempo di prueba di 3 aña.
E forma di procede di H. tabatin un efecto debilitante riba comunidad di Aruba. Corte ta tilde
pisa di esaki, sigur tambe pasobra e tabata polis pa añanan largo. E hechonan cu a keda
comproba contra dje ta grave y ta haci daño na e confianza cu e ciudadano mester por tin den
personanan manera H., cu ta ocupa posicionnan importante den sociedad. Hopi hende tabata
admira H. y tabata tambe depende di dje. Envez di sirbi e interesnan di e ciudadano, el a haci
maluso di su posicion como representante di pueblo pa su mes ganashi financiero. Ademas e no
a duna ningun muestra durante tratamento di e caso den Corte di ta weita cu loke el a haci ta
castigable y malo. Lo contrario, e ta indigna cu e tin cu para dilanti Huez.
Ministerio Publico lo sigui actua contra corupcion. E ciudadano mester por confia den
integridad di politiconan y cu politiconan ta anda cuidadosamente cu fondonan publico. Nan
mester sa cu Ley ta conta pa tur hende y cu politiconan corupto ta inacceptable.
OM : Sentencia Diamante
