Riba Dia di Himno y Bandera, Minister Maduro di Cultura a bishita Archivo Nacional Aruba ANA pa asina por cera conoci cu e exposicion nobo di ANA, titula ‘Diaspora Arubiano.’ Un exposicion den cual ta brinda un bista historico di ken e Arubiano ta y den cual a traves di un liña di tempo por mira e influencia cu e desaroyo economico tabata tin riba e constelacion di nos poblacion na Aruba. Desaroyo economico di Aruba a trece cune cu persona di varios Pais a bin yuda cu mano di obra y a haci Aruba nan hogar pa semper. Den e exposicion por mira, por ehempel, cual ta e origen di e famnan cu awe ta conoci como famnan di famianan Arubiano.
Den cuadro di e aña den cual ta conmemora e di 160 aña di abolicion di sclavitud den Reino Hulandes, ANA a inclui den e exposicion ‘Diaspora Arubiano,’ arte y informacion riba e historia di sclavitud na Aruba tambe. Un parti di nos historia cu no ta mucho conoci, pero cu yudansa di e digitalisacion di archivonan colonial nos ta haya sa mas di dje.
Pa conmemora nos Dia di Himno y Bandera, ANA a expone tambe algun di e 600 pintura cu tabata e resultado di e concurso cu a wordo haci pa por a yega na e diseño pa e Bandera di Aruba na 1976. Den e seccion aki di e exposicion ‘Diaspora Arubiano,’ tambe por admira un di e banderanan cu a wordo hisa dia 18 di maart 1976 na Wilhelmina Stadion.
Minister Maduro di Cultura ta gradici ANA pa a traha den tempo record riba e bunita exposicion aki. E mandatario ta invita Pueblo pa bishita ANA pa asina haya sa mas di ken nos ta. ‘Trece nos hobennan pa asina nan por haya sa ken e Arubiano ta y con Aruba a desaroya su mes. Conoce bo pasado, pa bo por compronde bo presente y pa bo por fiha bo futuro,’ ta palabranan di Minister Maduro di Cultura como invitacion pa cera conoci cu e exposicion nobo di ANA, ‘Diaspora Arubiano.’
