E tema di aña 2023 di e dia Internacional pa combati racism, dia 21 di maart, ta enfoca riba e urgencia pa elimina esaki, 75 aña despues cu a adopta e Declaracion Universal di Derecho Humano (Universal Declaration of Human Rights, UDHR). Na aña 1948 e communidad internacional a bay di acuerdo cu un cantidad di norma y balor ta pertenece automaticamente na cada un ser humano. Su derechonan no ta depende si e pais of estado, caminda e ser humano ta biba, ta dunele e derechonan aki. Reino Hulandes of Hulanda a firma e Tratado aki, pues e ta conta pa tur persona cu ta biba den Reino Hulandes. UDHR ta forma e plano pa normanan internacional di derecho humano. Tur hende tin e derecho riba tur derecho y libertad, sin ningun distinction na ningun forma, manera por ehempel e color di bo cuero. Sinembargo, racismo ta continua di affecta bida di personanan rond mundo, inclusivo Aruba.
Ignorancia ta un escogencia
Na Aruba e situacion ta asina, cu esnan cu ta wordo discrimina no ta sinti cu nan por admiti esaki publicamente, pasobra mesora nan lo wordo ataca of nan lo experiencia exclusion social na trabou of den nan circulo social. E miedo pa expresa opinion tocante di e trato, cu hende di color ta experiencia na Aruba, ta uno real. P’esey e ta importante pa defende Derecho Humano y no ridiculisa e cuidadano cu ta haci uzo di su derecho. Algo cu Minister Presidente Evelyn Wever Croes a participa na dje: Dia 6 di februari, durante su conferencia di prensa, el uza palabranan manera ‘anti-social’ pa esnan cu a expresa nan mal contento cu e dump. Den mi caso el compara mi persona cu un mucha disobediente cu ta lanta para den klas pa canta ora juffrouw ta duna les. Prueba cu den su opinion, derecho humano no ta conta pa tur hende of cu e tin e derecho pa dicidi ki ora un ser humano (di color) por protesta. No, MP Evelyna Wever-Croes, no ta abo ta dicidi, ni Rey Willem Alexander, ni Universidad, ken ta decente y ki momento y manera di protesta ta miho. Esnan cu ta pensa asina te awe, probablemente no a emancipa nan mente for di esclavitud y colonialismo mental. E cadenanan di esclavitud lo por a wordo kita for di e curpa di nos antepasadonan, pero cu e indoctrinacion y colonialismo den nos Gobierno, comunidad y educacion, ta keda na nos mes pa libera nos mente! Y e ultimo frase aki ta conta pa tur hende, irespeto di bo color, cu a wordo indoctrina exitosamente y no a scoge pa educa su mes. Pasobra den e epoca aki di informacion digitalisa, ignorancia ta un escogencia! E pregunta primordial awor ta keda: Ausencia di ignorancia, ta nifica presencia di intencion?
Eliminacion di Racismo na Aruba
Mi kier clausura y bisa, cu e ultimo lunanan despues di e protesta dia 31 di januari 2023, tawata uno fenomenal. Banda di entrevista y charla, mi a encontra tres activista pa Derecho Humano. Hunto nos a crea un Plataforma nobo pa Derecho Humano na Aruba. Nos a lansa nos FB Page HRAAruba (Human Rights Activists Aruba) riba dia 18 di maart. Siman pasa mi a encuentra e Representante Fiho di Nacionnan Uni pa Estado Reino Hulandes, cu ta staciona na Geneva, meneer Paul Bekkers. Paul Bekkers tawata interesa pa lesa mi rapport: “Nou Breekt Mijn Klomp”, cu ta trata violacion di varios tratado internacional, entre otro Prohibicion di Discriminacion a base di Nacionalidad, cu ta afecta hobennan nac’i na Aruba, cu kier sigui studia, pero cu no tin Nacionalidad Hulandes. E rapport aki tambe a wordo discuti ora mi a wordo invita door di Ministerio di Asunto Domestico y Reino Hulandes pa un entrevista inicial tocante mi protesta. E reunion aki a tuma lugar na Representacion Hulandes Oranjestad (VNO). Caminda durante 1 ora y mey informacion valioso por a wordo intercambia. E siman aki mi lo sinta na mesa cu e Rector Magnificus y e Presidente di e ‘College van Curatoren’, ambos di Universidad di Aruba, tocante mi protesta y e Historia di Eslavitud. E logro mas importante pa mi, ta cu awor, aunque e Comission di Commemoracion di Esclavitud Aruba, bou liderazgo di Minister di Cultura Xiomara Maduro, ta nenga di invita mi, despues cu mi a participa y entrega ideanan pa cu e commemoracion aki via e-mail y personal, cu algun personanan organisacionnan di decendencia Africano, awor si a wordo invita. Un paso chikito mas cerca di Eliminacion di Racismo na Aruba!
