Despues cu na september 2022 a firma un acuerdo pa prome biaha, na maart 2023, Aruba Tourism Authority y Comite Olimpico Arubano a bolbe firma un acuerdo, e biaha aki pa 2023.
Durante un conferencia di prensa Ronella Croes- CEO di A.T.A., Wanda Broeksema- Presidente di C.O.A. y Nicole Hoevertsz- Secretario General di C.O.A. a firma e acuerdo aki.
Ronella Croes, CEO di A.T.A. a probecha pa felicita C.O.A. cu nan oficina nobo y tambe cu nan ceremonia di apertura. Manera a indica aña pasa, ambos organisacion ta pone hopi atencion na traha como socio, pues ta mira e relacion aki como un “partnership”. Pa ambos organisacion e ta importante pa e acuerdo aki bira un compromiso pa termino largo, pa di e forma ey e bira algo sostenible.
Pa A.T.A., e asociacion aki ta uno natural, mirando cu e atletanan cu C.O.A. ta cultiva y desaroya ta representa nos pais dignamente y ta un promocion grandi pa Aruba, pa medio di nan participacion den diferente competencia, na diferente pais. Sin lubida e promocion grandi cu Aruba ta haya durante weganan olimpico.
Durante e conferencia di prensa a enfoca tambe riba e importancia di tin un asociacion entre A.T.A. y e mundo deportivo mirando cu hopi peticion ta drenta na A.T.A. pa duna aporte na deporte. E maneho di A.T.A. pa cu esaki ta primordialmente basa riba duna aporte na eventonan local cu ta conduci entre otro na atraccion di un cantidad di bishitante di afo. A.T.A. ta considera calidad di produccion di e evento y si e ta yuda posiciona Aruba di cierto manera. Por pensa aki riba hecho cu A.T.A. ta duna su aporte na un eventonan mane por ehempel Beach Tennis, KLM Marathon, Aruba Hi Winds, y eventonan di golf.
Adicionalmente e competencianan internacional na Aruba cu A.T.A. ta envolvi aden ta duna atletanan local e oportunidad pa competi na Aruba riba nivel internacional. Tambe A.T.A. ta reconoce e rol cu deporte tin den yuda forma comunidad y hobennan.
A.T.A. ta considera e relacion cu C.O.A como uno special ya cu ta reconoce netamente e importancia di embahadornan olimpico cu ta promociona Aruba internacionalmente.
