Boneiru tin un ròl prominente na e konferensia tokante awa di Nashonnan Uní ku ta tuma lugá di 22 te 24 di mart na New York. Djárason 22 di mart, Boneiru huntu ku Kòrsou tin na nan enkargo un seshon spesial tokante maneho di awa relashoná ku kambio di klima. Gezaghèber Edison Rijna ta un di e oradónan. Rei Willem-Alexander lo asistí na algun di e presentashonnan.
Ta e promé konferensia di Nashonnan Uní tokante awa den kasi 50 aña. Organisashon ta na enkargo di Reino Hulandes i Tadjikistan. Kasi tur pais tin reto ku awa. Sea ta inundashon òf hustamente sekura ekstremo. Awa tin impakto grandi riba mantenshon di bida di biónes di hende, riba seguridat di alimentashon i energia, i riba salú di hende i medio ambiente. Mundialmente 884 mion hende no tin akseso na awa limpi di bebe. Ademas pa motibu di drispidimentu, kontaminashon i kambio di klima, mas i mas suministro di awa ta bou di preshon. Meta di e konferensia ta pa yega na un Agènda di Akshon di Awa den kua estadonan miembro ta komprometé nan mes pa aselerá realisashon di Meta 6 di Desaroyo Sostenibel di Nashonnan Uní: na 2030 awa limpi i fasilidat sanitario pa tur hende.
Honor spesial
“Islanan chikitu apénas ta kontribuí na kambio di klima, pero nan ta eksperensiá komo promé i hopi biaha na un grado hopi haltu e efektonan negativo. Nos ta mira esei sosodé na Boneiru tambe, motibu pa kua nos a krea un Mesa di Klima i resientemente a laga ekspertonan di gobièrnu hulandes konsehá nos tokante maneho di awa. Parsialmente pa motibu di e inisiativanan akí, a invitá nos pa kompartí nos eksperensia, konosementu i vishon ku partisipantenan na e konferensia. Ta un honor spesial ku nos komo isla chikitu por presentá riba esenario mundial di Nashonnan Uní”, segun gezaghèber Rijna, kende ta orguyoso ku e ekipo konhunto di Boneiru i Kòrsou despues di lunanan di preparashon a logra traha un programa ku kontenido fuerte ku sosionan di renombre, bou di kua Global Water Partnership, Local2030 Island Network, Global island Partnership, Pacific Community, International Panel for Delta’s and Coastal Areas i Caribbean Climate Smart Accelerator.
Durante e evento, ademas di Gezaghèber lo papia entre otro presidente di AOSIS Dr. Lutero i e Enviado di Klima prens Jaime de Bourbon de Parme. Un pènel di diskushon ta inkluí entre otro minister-presidente di Aruba Evelyn Wever-Croes, minister Egbert Doran (Sint Maarten) i komisario athunto di gobièrnu di Sint Eustatius Claudia Toet. Minister hulandes di Infrastruktura i Atministrashon di Awa Mark Harbers ta sera e evento. Mirando e kantidat grandi di registrashon, interes di e 193 estadonan miembro di Nashonnan Uní ta grandi. Gezaghèber Rijna lo papia tambe durante e lansmentu ofisial di Plataforma Internashonal pa Areanan di Dèlta i Kosta. Tambe e ta partisipá na un seshon di desayuno na kua rei Willem-Alexander a invitá representantenan di Estadonan di Islanan Chikitu i den Desaroyo.
Por haña mas informashon i henter e programa di Konferensia tokante Awa di Nashonnan Uní na https://sdgs.un.org/conferences/water2023
