Parlamento a trata e ley unda Gobierno di Aruba, specificamente minister di Turismo y Salud, a pidi e apoderacion na Parlamento pa paga un acuerdo di e settlement cu Lee Tofanelli & Associates (LTA) cu ta e conpania cu Gobierno di Aruba desde 2002 a contrata pa organisa Aruba Music Festival.
E historia ta cuminsa desde 2008 momento cu e Mininster di Turismo e tempo ey, sr. Briesen, a cera un contract cu LTA pa di tres bes pa organisa Aruba Music Festival mirando e exito di e actividad aki. Un festival cu ta den su momentonan di gloria tawata trece artistanan grandi pa Aruba. Den e industria di Turismo na Aruba, cu ta aporta grandemente na nos economia, festival di musica ta un niche market importante pa engrandece e mercado turistico. Aruba Music Festival ta un evento cu a trece artistanan grandi manera Lionel Richi, grupo Queen, Paul Rodgers, Gloria Estefan, Earth Wind & Fire y Carlos Santana pa menciona algun. No cualkier artista a wordo treci Aruba si no artistanan di caliber cu si kier programa nan presentacion na Aruba, lo mester asercanan cu basta tempo di anticipacion mirando cu hopi di nan ta riba tour of den record studios pa albumnan nobo.
Pa e motibo aki tambe pais Aruba ta cera contract adelanta cu e compania di Lee Tofanelli mirando cu ta programa cu basta aticipacion e artistanan cu Aruba ta aim pa trece. Pakico esaki ta importante? Paso ta depende ken ta e artista cu ta wordo treci pa e Music Festival cu esaki tin su efecto riba e cantidad y calidad di turista cu ta atende. Esaki ta bay hunto cu e Return on Investment (ROI) midi cu organisacion di e festivalnan aki. Si tuma nota di datonan turistico den Banco Central di Aruba su Statistical Digest tabelnan A5 cu ta regarda indicadornan di actividad turistico, por tuma nota cu cu e indicador di “receipts per visitor nights” tawata 403 florin. E indicador aki ta bisa cuanto placa Aruba ta ricibi pa anochi cu e bishitante ta na Aruba. E resultado di 403 florin sigur ta uno cu no a wordo logra den e decada ey. Si wak desde 2011 pa 2020, añanan 2013, 2014 y 2017 a mishi cu e nivel di 2008 pero ta apenas na aña 2018 bin ariba cu realmente a surpasa e nivel di resultado logra desde 2008.
Pues sr. Briesen su maneho pa cu turismo a duna su frutonan y aña 2008 ta e miho aña den turismo pa hopi tempo. Si e datonan aki ta bisa claramente cu tawata tin ROI sin conta cu den documentacionnan uza durante e reunion aki ta bisa hopi cla, cu e impacto evalua di concierto 2008 ta bisa cu a trece bishitante di 21 diferente pais cu un impacto economico di over US$9,7 miyon. Esaki sigur ta splica e motibo pakico a cera contract bek cu LTA. Si Aruba tin un winning formula y ta evalua esaki te cu 2008, pakico no sigui cu n’e? Mester remarca cu e contract aki a wordo kibra pa e gobierno cu a sigui despues di eleccion 2009. Si e Gobierno di AVP no a termina e contract aki, e entradanan aki no lo a baha. Na momento cu AVP a dicidi di termina e contract aki e consecuencia tawata directamente pa Aruba su entrada economico y no pa e Gobierno anterior of e miniser di Turismo anterior, esta sr. Briesen. Ta nos pais a keda perhudica un bes mas!