Danki na e curashi y vision di Betico Croes:
Diasabra 18 di maart ta un dia hopi special pa e pueblo Arubano ya cu nos ta celebra nos Dia Nacional, nos Dia di Himno y Bandera. Pero e fecha aki tin un nificacion historico tambe pa loke ta e lucha di nos pueblo pa su Status Aparte, ya cu nos ta conmemora cu 50 aña pasa, esta dia 18 di maart 1973 un Manifestacion masal a ser organisa den Wilhelminastadion.
Viahe di Betico pa Surnam
E manifestacion grandioso aki a ser organisa pa partido MEP, despues cu e aña anterior, esta na augustus 1972 Betico Croes a viaha pa Surinam formando parti di e Comision di Reino representando su isla Aruba. Na e ocasion aki Betico a trata di convence Hulanda cu Aruba no ta desea di forma parti di un federacion Antiyano, esta un federacion basa riba ‘one man, one vote’. Sinembargo durante e conferencia aki Betico Croes no a haya apoyo di e otro partidonan politico di Aruba. Nan a declara cu Betico Croes no por papia na nomber di e pueblo Arubano ya cu e ta representa unicamente 7 asiento, esta un minoria den Parlamento di Aruba. No a keda Betico Croes nada otro cu bandona e reunion declarando cu “mi ta bay bek cerca mi pueblo, pero lo mi bolbe”.
Miles y miles di manifestante
Despues di yegada di Betico Croes na Aruba, el a cuminsa cu accionnan extra parlamentario cu e unico meta pa haya mas oido pa e causa di Aruba cerca Hulanda. Asina a ser dicidi pa organisa riba 18 di maart 1973 un manifestacion masal den Wilhelminastadion pa demostra dilanti di e parlamentarionan di Hulanda, Antiyas y Surinam kendenan a forma parti di Comison di Reino, cu Aruba ta rechasa e federacion Antiyano y ta decidido den su lucha pa logra su libertad, esta su Status Aparte. Ora cu e mainta ey e miembronan aki di Comision di Reino a drenta Wilhelminastadion, nan a keda impresiona di mira un multitud di miles y miles di manifestante cu pancartanan y borchinan caminda e pueblo a expresa su mes den forma decidido pa un Status Aparte pa Aruba.
Contenido di algun di e borchinan
E borchi y pancartanan a encera entre otro lo siguiente: Antillen is een fictie, Status Aparte pa Aruba, Cu Aruba uni nos lo triunfa, Curacao schittert met Aruba’s geld, Als Antilliaan geen bestaan, We people of San Nicolas demand Status Aparte, Slaventijd is voorbij, Federatie is Aruba’s ondergang, Prefera muri riba pia cu biba na rudia, Oom Nederland denk aan uw neven en nichten in de West, Aruba los van Curacao nu of nooit, Moeder Nederland help uw kind Aruba, Vrijheid of dood, Geen gedonder wij eisen Status Aparte, Federacion RIP, Vox Populi Vox Dei.
Cu e manifestacion aki 50 aña pasa Betico Croes desde e aña ey a pone su stempel pa bira e lider y portavoz indiscutibel di e lucha pa Status Aparte.
Partido MEP ta felicita pueblo cu e manifestacion masal aki y specialmente esnan cu tabata presente riba e dia historico aki ya cu finalmente e manifestacion aki a resulta e catalisador pa realisacion di nos Status Aparte na 1986. Danki Betico pa bo curashi y vision!
