Tres aña despues di COVID Aruba tin su bida practicamente igual cu prome cu su yegada. Pero por bisa awe cu el a siña nos algun les, a pesar cu na mesun momento por bisa cu hopi hende a perde nan bida innecesariamente.
Algun dia atras a cumpli tres aña desde cu Organizacion Mundial di Salud (OMS) a uza e palabra pandemia pa prome biaha ora cu tabata referi na e emergencia cu a surgi mundialmente cu yegaa di Covid-19. Na momento cu mundo ta [a[oa do casi 120 mil contagio registra y mas di 4 mil morto, Aruba a bati alarma riba 13 di maart pa su prome casonan di contagio.
Awendia ta papia di mas cu 750 miyon di casonan di contagio rond mundo y 6.8 miyon mucha, adulto y anciano cu a perde nan bida, kisas innecesariamente, mescos cu na Aruba, pa motibo cu hende e tempo ey no tabata tuma na serio e seriedad di e situacion.
Gobierno e tempo ey pa enfrenta e diferente olanan di brote a cuminsa pa tuma medidanan drastica cu a topa cu hopi obheccion. Den cierto casonan kisas tin instancianan cu a sinti e poder cu nan a wordo e derecho pa haci cosnan un tiki di mas, pero por lo general por bisa cu tabata trata di medidanan necesario pa un isla cu tabata depende completamente di turismo, como su unico pilar economico. E tempo ey e cera frontera. Hopi lihe e prome victimanan a cuminsa cay y awe por bisa cu algun 100 persona a perde e bataya contra Covid-19.
E pandemia a duna e pueblo di Aruba hopi indicacion. Prome luga ta cu no mester bini un pandemia pa cada ciudadano tuma responsabilidad pa su curpa y su salud. Hiba un bida sano ta yuda hopi ora cu enfrenta retonan di salud asina grandi, cu Aruba sigur no tabata prepara p’e. Danki na ayudo tecnico ricibi for di Hulanda cu nos a logra pasa e periodo dificil y awe por bisa cu e situacion ta practicamente igual na prome cu Covid-19, pero cu un daño inmenso cu el a causa. No lubida ta un di e paisnan mas perhudica door di e Pandemia. Door di e cierre di frontera, hopi hende a wordo manda cas y te ainda no ta tur a haya trabou bek of tin e salario di antes. Aruba mester a presta placa for di Hulanda cu a aumenta debe di e pais grandemente.
Tres aña despues por bisa cu Covid-19 a afecta bida di esnan cu a sobrevivi e pandemia. Hopi hende a keda cu consecuencianan sea di Covid-19 mes of door di e vacuna tuma. Personanan cu te ainda no recupera nan sabor of olfato, otronan cu a sufri di vertigo of a keda cu pulmon debilita, bahando e calidad di bida. Ta consecuencianan cu e personanan aki lo carga pa resto di nan.
E hecho cu hopi hende a keda cera den nan cas pa periodo largo, limita nan accion of movecionnan, cu a afecta e salud mental inmensamente. Casonan di ansiedad y depresion a aumenta y Aruba no tin e cantidad di profesionalnan necesario den e ramo pa yuda e pashentnan aki. A consecuencia di e pandemia ta forsa Aruba pa reduci su gastonan den salubridad, loke lo trece otro consecuencianan pa e ciudadanonan.
Hopi cuestionamento tabatin riba desaroyo di e vacunanan contra Covid-19 desaroya den forma record y pusha den man di paisnan di mundo, Aruba tambe, cu tabata desespera cu e situacion di salud causa pa e pandemia.
Hopi cos a siña tambe, den sector di salud, tecnologia, forma nobo pa organisa nos mes, con pa protege nos miho y cu habitonan di hygiene personal uzando tapaboca y gel, forma nobo pa saluda otro y convivencia.
E confinamento a trece cu ne cu a realisa cu famia ta hopi importante. Na momento cu e malesa a bati na porta di un cas, un tabata yuda otro. Famia y bisiña tabata prepara cuminda pa e cas unda tin famia infecta. Hecho cu no por tabatin contacto personal cu famia y otronan, tabatin su impacto. Despues di retiro di restriccion por a sinti cu e convivencia entre famia a aumenta.
Y mescos cu den problemanan grandi, hopi hende a mira nan Fe renoba.
A crea sistemanan nobo di traha. Un persona por traha den hopi caso for di cualkier sitio. Solamente mester di un computer (laptop) y internet. Inclusive Enseñansa a dal e stap dilanti aki. Pa Aruba specificamente el a modernisa sistema di brinda servicio unda cu mayoria di accionnan por tuma luga digitalmente. Pa algun hende, grandi, esaki ta un molester ya cu no ta custumbra cu e sistema moderno. Pero e ta un sistema eficiente, cu por wordo mehora. Awendia un persona por traha for di unda cu e ta.
Den e crisis por a nota cu a crea vacunanan den tempo record, cu aunke su eficiencia a wordo cuestiona, por bisa cu el a salba bida di hopi hende. Esaki den e sentido cu nan no a haya e malesa mas pisa, pasobra e vacuna no ta evita cu no ta haya e Covid. Pero e sintomanan ta mas leve.
Tambe e situacion a siña nos cu nos salud ta den nos mesun man y si siña nos yiunan for di chikito hiba un bida saludabel, na grandi tin menos complicacion.
Y un otro aspecto importante ta algo cu aki na Aruba hopi no ta preocupa cu ne. Ta traha pa gasta y no ta preocupa pa spaar algo pa na momento di crisis. Na momento di e pandemia, hopi famia a confronta problema pasobra tata y mama a wordo manda cas, sin nada den spaarpot pa enfrenta e situacion. Esaki ta algo cu sigur cu gobierno por yuda fomenta bou di e pueblo.
Awendia nos tin ciudadanonan hopi mas responsabel cu nan higiena personal, uzando likido pa haci man limpi, mantene cierto distancia, si ta malo ta tuma precaucion pa evita di contagio otro, aunke cu ta trata di solamente un griep.