Prensa na Kòrsou no ta di kuater poder !
Libertat di ekspreshon ta un derechi sagrado den un komunidat i ta parti esensial den un pais demokrátiko. E ta un derechi klásiko fundamental pará den konstitushon. Tur intento pa mina libertat di ekspreshon, ta un atentado kontra demokrasia. Na momentu ku ta limitá ekspreshon liber di kualke siudadano, grupo di siudadano òf organisashon, nos ta papia di sensura òf violashon di libertat di prensa. Ora ta trata di ekskluí un òf mas medio di prensa pa risibí informashon ta papia di sensura. Ora ta ekskluí siudadanonan di un pueblo pa haña informashon di gobièrnu tambe ta papia di sensura. Sensura, eksklushon i konsekuentemente atentá kontra demokrasia ta sosodé ku sierto grado di regularidat den komunidat di Kòrsou.
Si no denunsiá esaki hamas lo e sali na kla. Kousa Promé ke mustra riba algun akto kondenabel aki na Kòrsou ku ta kai bou di atentado kontra libertat di prensa.
E echo ku ta ninga un medio di prensa akseso den un sala kaminda un gobernante ta duna informashon na prensa, ta un akshon kontra demokrasia. Pues na momento ku prensa no por partisipá na un aktividat kaminda un mandatario den funshon ta duna informashon ta nifiká ku a limitá prensa den su trabou di informá pueblo.
Un atentado kontra libertat di prensa ta tambe ora un mandatario den funshon invitá no tur medio di prensa pero solamente algun di su preferensia. Dikon algun i no tur. Dikon nèt esnan ei i no tur?
Remarkabel i sumamente peligroso ta e echo ku sobra medionan di prensa a aseptá ku e minister den funshon a ekskluí TV Direct. Esaki ta un atentado frontal kontra libertat di prensa, ophetividat, transparensia, demokrasia i bon gobernashon.
Tur kaminda ta papia ku prensa ta e di kuater poder den komunidat. Na Kòrsou prensa bou di ningun sirkunstansia no ta e di kuater poder. Dikon no? Pasobra prensa no ta uní den un solo frente kombativo pa defendé libertat di prensa. E di kuater poder ta un prensa uní i solidario ku ta sali dilanti pa defendé libertat di prensa i di ekspreshon den pais. E di kuater poder no ta kada media apart riba su so pero e unidat prensa, e konsepto prensa. Prensa na Kòrsou ta repartí den vários grupo di poder ku kada un ku nan aliado i preferensia den e mundu polítiko i di kapital. Ta p’esei un grupo di periodista ta aseptá pa asistí na un rueda di prensa selektivo i privá di un mandatario den funshon. Na Kòrsou prensa ku polítika huntu ta forma un solo poder: poder polítiko.
Un ehèmpel di eksklushon i atentado kontra libertat di prensa ta sensura di kontenido di e informashon ku ke duna pueblo. Un mayoria grandi di prensa ta sensurá kontenido di komunikado òf intervenshon na nan medio. Duna informashon kontra kolonialismo hulandes, kontra Kas Real, monarkia i reino hulandes ta prohibí serka vários medio di komunikashon. Ta prohibí pa papia riba Kòrsou independiente. Mester papia di reino hulandes òf Caraibisch Nederland. Otro restrikshon i forma di represhon di libertat di prensa ta ora gruponan progresivo i emansipativo ta propagá rèspèt pa outonomia di Kòrsou komo pais den reino i ora nan ta propagá“Nos mes Por”. Tin medio di prensa ku asta a sostené e ponensia estúpido, kobarde i anti-patriótiko ku ta bisa: ” No por kome outonomia”awèl lubidá outonomia i ban keda den reino huntu ku Hulanda ku ta stima nos.
Medionan di prensa por lo general ta hostil ora ta trata di organisashon polítiko ku tin un opinion diferente for di sobrá. Un organisashon òf militante ku tin un vishon emansipatorio i ku ta boga pa Kòrsou para riba su mes pia. Un mayoria grandi di prensa televisá, radial i skirbi ta haña ku ora ta papia di polítika mester papia di reino hulandes i nada otro i preferibel na un manera amistoso. Tur loke ta bai kontra reino, mayoria medio di prensa ta trata na silensiá òf bagatelisá. E palabra independensia ta manera palabra malu pa mayoria di prensa. E ta manera un palabra prohibí.
E palabra “independensia” ta lanta serka e periodista un tendensia pa drenta den defensa òf kuminsá un kontra atake.
Violashon di demokrasia i libertat di ekspreshon ta kulminá den temporada di elekshon. Den temporada di elekshon mester tin espasio de sobra pa forma i informá e pueblo votadó ku ta pará dilanti un desishon importante pa su futuro. Dunamentu di informashon den temporada di elekshon ta ser torpediá malamente pa prensa aki na Kòrsou.
Esaki ta represhon fundamental di e derechi i libertat di ekspreshon. Den temporada di elekshon prensa ta solidario i ta sera kabes subi preis barbaramente pa spòt i orario pa promoshon polítiko na radio, korant i televishon. E komersialisashon di elekshon i polítika aki tin komo konsekuensia ku ta ekskluí organisashonnan di ménos rekurso i esnan ku ta suak na kapital pa por komuniká ku pueblo. Esaki ta ilustrá e echo ku elekshon i gobernashon ta un eksklusividat di gran kapital. Ku e konsekuensia ku despues di elekshon ta”wie betaalt bepaalt” ta konta. Algu ku nos ta konstatando kada bes atrobe despues di tur elekshon. Subimentu di tarifa di radio televishon i korant den temporada di elekshon pa dunamentu di informashon polítiko ta un atentado serio kontra demokrasia, libertat di ekspreshon i e derecho fundamental di pueblo pa risibí informashon polítiko pa e por vota konsiente. Gobernashon na Kòrsou nunka a sali na defensa di demokrasia i libertat di ekspreshon. Nunka niun gobièrnu a kondená e libertinahe i abuzu di preis den temporada di elekshon. Esaki ta prueba di violashon di e prinsipio di bon gobernashon.
Pues, no ta solamente prohibishon diktatorial di un medio di prensa pa partisipá na un aktividat informativo selektivo di un mandatario den funshon,ta kontra demokrasia.
E akto di un mandatario den funshon pa invitá un grupo selektivo di prensa pa kubri i divulgá su informashonnan na pueblo tambe ta un akto kontra libertat di prensa i kontra demokrasia.
Un prensa politisá i partidario ku ta aprobá eksklushon di e propio prensa i ku ta ekskluí, silensiá, sensurá parti di su komunidat tambe ta kometé un atentado kontra demokrasia. Plaka ku ta korumpí polítika i elekshon tampoko ta sirbi demokrasia.
Kousa Promé ta sigui kondená tur akto di violashon di libertat di prensa aki na Kòrsou.
Kousa Promé ta boga pa un dekreto gubernamental ku ta stòp i sanshoná tur forma di komersialisashon i eksplotashon di polítika i elekshon na Kòrsou.