Ora nos tende of lesa cu tin 6 cos cu Señor ta odia, si 7 cos cu ta un abominacion pa Dios., hende lo reacciona mes ora y bisa cu Dios ta amor , con por ta posibel cu Dios ta odia.
Tur hende mester sa cu Dios no ta odia hende, pero si e ta odia e pica cu hende ta haci, pasobra e pica ta bini di e malbado, y ora nos haci pica nos ta desobedece Dios, y esey ta lanta furia di Dios.(Colosensenan 3:5+6).
E 6 cosnan cu Dios ta odia y e di 7 cu ta un abominacion pa Dios ta para scirbi den Proverbionan capitulo 6 :16-19.
Cara Orguyoso,( wowo altanero).
Un lenga mentiroso.
Mannan cu ta drama sanger inocente,
Un curason cu ta plania maldad,
Pianan cu ta lihe pa corre haci maldad,
Un testigo falso cu ta papia mentira,
Y esun cu ta sembra( continuamente) desunion entre rumannan.
Cara orguyoso ta bini di un mente orguyoso, y tur hende mester ta na altura na unda orguyo a cuminsa. Orguyo a cuminsa den cielo y nos tur mester lesa esaki den Ezekiel 28: 12-19 y Isaias 14: 12-15, caminda cu nos tur por sa cu Dios a crea angel Lucifer cu a bira orguyoso y kier a tuma lugar di Dios y kier a sinta riba e stul di Dios.
E a rebeldia contra Dios hunto cu un tercera parti di angelnan den cielo, y tabata tin un bataya den cual Lucifer y su compiche nan a perde y a wordo saca na mal ordo for di cielo.
For di eynan nos tin cu realisa cu orguyo ta bini prome cu cu caida. Y esey nos por comproba tambe den e palabra di Dios cu ta bisa den Santiago 4:4-6 ;
Boso adulteronan , boso no sa cu amistad cu mundo ta enemistad pa cu Dios?
Pesey ken cu kier ta amigo di mundo ta haci su mes enemigo di Dios.
Si boso ta kere cu envano Scritura ta papia: E ta anhela celosamente na e Spirito, kende E a haci biba den nos?
Ma E ta duna un gracia mas grandi ainda.
Pesey Scritura ta bisa: Dios ta resisti e orguyosonan ma ta duna gracia na e humildenan.
Si tur mayor splica nan yuinan e Seis cosnan cu Dios ta odia y e di Siete cu ta un abominacion pa Dios, awel nos lo a evita hopi pelea na scol y riba caya.
Pasobra nos ta biba den tempo trabahoso, y maldad ta skeiro tur caminda, y nos mester purba tur manera di evita cu nos yuinan di un of otro forma ta cay den gara di e enemigo.
Y si e palabra di Dios wordo aplica tur momento den nos bida, e nivel di integridad den comunidad lo ta hopi halto, hasta e gasto di asuntonan social y criminalidad lo baha si hende por a atene nan mes na e palabra di Dios.
Bo puntra cualkier mucha di scol riba caya, si e a yega di tende di Proverbionan 6;16-19 na scol e lo bisa bo absolutamente cu no, pasobra na scol e cosnan ey no ta ta wordo introduci na muchanan pasobra Bijbel a wordo saca for di scol.
Pesey nos como mayor mester haci esaki un parti primordial di nos educacion na cas, pa asina evita, confrontacion innecesario.
Pero que hubo di nos mes como hende grandi, esaki pa nos mes tambe, cuanto divorcio, violencia relacional, violencia domestico, rabia e pleito por wordo evita, si nos atene nos mes na e palabra di Dios.
