Parlamentario Marco Berlis (MEP): Preguntanan na Minister Ursell Arends riba investigacion di Serlimar

Recientemente mi a manda un serie di preguntanan na minister Ursell Arends tocante di e progreso di e investigacion forensico cu ta tumando lugar den Serlimar. Mi preguntanan a surgi basa riba un mocion di sr. Raymond Kamperveen, cual a urgi gobierno di Aruba pa presenta na Parlamento di Aruba, e resultado di e investigacion na Serlimar, no mas tarda cu 31 di Januari. Esaki no ta e prome biaha cu Parlamento a puntra minister Ursell Arends pa e status di e investigacion famoso aki cu ta tumando lugar. Na 2021 Minister Arends a indica cu esaki lo keda cla pa December 2021, pero ora e fecha a yega, esaki no tabata e caso. Durante otro reunionnan publico e pregunta aki ta keda bini dilanti. Te ainda ni Parlamento ni pueblo a haya un contesta ni tampoco e motibo pakico e investigacion forensico aki ta tumando asina hopi tempo.

Dicon e investigacion forensico aki ta importante? E ta importante pa hopi motibo mes. Nos tur ta corda con famoso Serlimar a bira ora cu partido POR a expresa su deconfiansa den su propio minister di Infrastructura sra. Marisol Lopez-Tromp, cual nan a purba retira tambe despues atraves di un mocion di desconfiansa. Un problema interno di POR a bira e problema di coalicion, cu despues ministerraad a haye ta kita Marisol di trabao. Ta durante e “show politico” di Marisol, e famoso termino “spiritonan” a bin dilanti y pa hopi anochi Marisol a postula su mes como un persona contra corupcion y di kier para pa integridad. Di e tempo aya ta papia di un “investigacion” den Serlimar caba y cu lo ta andando. Awor, e investigacion aki a wordo amplia pa asina gobierno por tin un miho bista kico tur a sucede eyden. Den e sala di Staten por a scucha gritonan di fraude, corupcion, hende cu ta cobra sin traha y mucho mas. Esaki ta e motibo pakico Parlamento y sigur mi persona ta urgi minister Arends pa contesta Parlamento y informa nos riba e status di e investigacion aki. 

Den cuadro di tur esaki mi a haci minister Arends 10 pregunta tocante e progreso di investigacion aki. Un investigacion cu Marisol a bisa cu e “no kier pa Parlamento haya den su man.” MAS a vota na januari contra pa Parlamento haya e investigacion aki den su man! Kico a pasa cu Marisol? Kico Marisol tin di sconde? Di berdad e rapport forensico aki lo produci evidencia of evidencia di mentiranan di Marisol? Ban wak! Marisol y Gunn a expresa cu nan ta contra pa Parlamento haya e investigacion riba e ultimo dia di tratamento di presupuesto 2023! Esaki ta algun di e preguntanan cu mi a haci minister:

1. Minister por duna un fecha definitivo ki dia Parlamento lo haya e rapport di e investigacion aki den su man manera e mocion aproba aki ta urgi gobierno? 
2. Mirando cu den e mocion tin diferente punto di mal maneho, fraude y falta di Good Corporate Governance entre otro, Minister por duna algun detayes, cifranan y datos caba na Parlamento di kico exactamente ta pasando na Serlimar? 
3. Minister mirando cu den pasado un ex minister Marisol Lopez Tromp encarga cu Serlimar supuestamente a laga investiga Serlimar na 2020, y awor recientemente durante di tratamento di Presupuesto 2023 a vota contra e mocion aki pa Parlamento haya e rapport aki den su man, minister por duna Parlamento algun informacion si enberdad tabata tin e supuesto “spiritonan” aki den Serlimar?

Si pueblo desea mas informacion di e articulo aki, contact mi na tel: 528-4639 of email mi na: marco.berlis@parlamento.aw / Bo parlamentario y sirbidor di pueblo na bo ordo semper!