Pastor Marcel Balootje: Capricho, karakter fuerte, nenga di pordona , ta comportacion carnal

Bin serca Mi tur cu ta cansa y carga, y lo Mi duna boso sosiego. Tuma mi yugo riba boso. Y siña di Mi,pasobra Mi ta manso y humilde di curason, y boso lo haña sosiego pa boso alma.Pasobra mi yugo ta facil y mi carga ta lihe.( Mateo 11:28-30).

Nos tur mester ta imitadornan di Hesus, pa asina nos por bira disipelnan di Hesus, pa e bida y amor di Hesus por refleha den nos, pa hende por mira Cristo Hesus den nos y desea pa nan tambe por comberti na Hesus y haña bida eterna.

Ningun tipo di orguyo, y capricho no ta obra pa bon den nos bida,especialmente ora ta un asunto di Famia, pa nos no keda mara riba algo, keda venga, of trata di tene otro abao, of no pordona,pasobra esey no ta di Dios.

E aire negativo cu ta supla riba mundo henter, ta invadi hogar y nos mester ta alerta, pa nos no imita e mundo , pero imita Cristo kende ta manso y humilde.

Berdad cu nos mester para firme contra pica, pasobra Dios ta stima hende y ta odia pica, pasobra capricho y un curason cu no kier arepenti ( Romanos 2:5) ta pone hende rechasa Dios, y ta montona  furia di Dios contra hende.

Dios ta bati na nos porta y bisa pa bandona pica, y hende ta busca tur excuus y defensa pa keda biba den pica. 

Den 2 Timoteo 4:3+4 ta bisa: Ma e Spirito Santo ta bisa claramente cu den e ultimo temponan algun lo cay for di fe, door di paga atencion na spirito engañoso y doctrina di demoño .Pa medio di e hipocrecia di gañadonan, kende nan mes consenshi a wordo kima como si fuera ta cu hero cayente esaki .

Nos tin cu publica bon cla pa tur hende sa y realisa e gran berdad cu tur locual ta contra e Berdad di Dios,y cu ta resisti contra Dios,aunke con bunita e por mustra, y aunke cuanto hende ta apoya,aunke ley por wordo cambia e ta keda Pica.Pasobra maldad kier domina , y nos mester ta alerta pa no participa, ni tampoco sostene.

Un mayor mester coregi su yiu, e mester displina su yui, pa asina e yui lanta den bon caminda, si e mayor no haci esey, mayan cu Dios kier e mes lo lamenta, y cada dia cu nos tarda pa coregi y pone displina riba nos yui, e compartacion di e mucha ta bira pio.

Bendiciona ta e hende cu semper tin temor, ma esun cu ta haci su curason duro, lo cay den calamidad.

( Proverbionan 28:14).

No usa karakter fuerte contra bo mesun sanger, pasobra esey no ta di Dios, si un hende haci algo y e demostra arepentimento, semper nos mester ta cla pa pordona mescos cu Dios ta pordona nos.

Tene cuenta cu locual ta para scirbi:

Esaki mi ta bisa anto y ta afirma hunto cu Señor, pa boso no cana mas, mescos cu pagano nan tabata cana, den e banidad di nan mente, siendo tapa cu scuridad den nan comprendemento, exclui di e bida di Dios, pa motibo di ignorancia cu ta den nan, pa motibo di duresa di nan curason.(Efesionan 4:17-19).

E tempo a yega pa nos pone un banda e hende biew cu ta wordo corumpi cu pasion engañoso, y pa nos wordo renoba den e spirito di nos mente, y pa bisti di e hende nobo, cu a wordo crea segun Dios, den husticia y santidad berdadero.

Capricho ,Karakter fuerte,Falta di pordon y Duresa di curason, ta haci daño na nos bida spiritual, y nos Famia.