Indebon ta trese federashonnan di deporte huntu

Siman pasá e di dos ‘Sport Federation Meeting’ (enkuentro di federashonnan di deporte) a tuma lugá na Boneiru. Durante e enkuentro di ret akí, fortifikashon di e kolaborashon entre e federashonnan di deporte na Boneiru tabata sentral i nan a papia tokante desaroyonan riba tereno di moveshon i partisipashon na deporte.

Representantenan di diferente disiplina di deporte, manera basketbal, rugby, waterpolo, yudo, hockey i ‘ultimate frisbee’ a duna akto di presensia. Nan a papia entre otro tokante e deseo pa un sistema di hasi reservashon online, kaminda federashonnan i organisashonnan di deporte na un manera fásil por hür sala i espasio pa hasi nan aktividatnan deportivo.

Indebon, e departamento di deporte di Entidat Públiko Boneiru, a organisá e ‘Sport Federation Meeting’. Diputado James Kroon di Deporte tambe tabata presente i el a bisa: ‘Esaki ta resultado di un vishon klarito riba deporte lokal. Organisashonnan kualitativo di deporte ku sosten profeshonal, ku den un forma korekto i den un ambiente seif ta duna lès na nos hóbennan lokal. Nos tur tin ku bai move mas. Esaki ta bon pa nos kurpa i pa nos mente, i pues pa nos komunidat tambe.’ 

Akuerdo Karibense di Deporte i Prevenshon 2019 – 2023

Desaroyo di Deporte na Boneiru i aktividatnan manera esaki, ku tin komo meta pa organisá deporte na un manera duradero na nos isla, ta forma parti di e Akuerdo Karibense di Deporte i Prevenshon 2019 – 2023. E akuerdo akí ta marka e laso di kolaborashon entre Entidat Públiko Boneiru i Ministerio di Salubridat Públiko, Bienestar i Deporte, i e ta fungi komo un kapstòk kaminda ta kologá tur proyekto pa e infrastruktura di deporte, pero tambe formashon i guia di e dirigentenan i e organisashonnan.