E político di oposición na Surnam Syephano “Pakittouw” Biervliet a bisa cu e lo bay Polis. Autoridadnan ta busk’e debi na iregularidadnan diabierna den Parlamento Surnameo y den centro di Paramaribo. E demostracion cu a bini prome cu esey, a wordo organisa door di Biervliet.
El a bisa den un declaracion cu e no tin nada di haber cu e iregularidadnan. Un grupo cu cual e no tin contacto cu nan, a separa nan mes pa bay edificio di Parlamento, segun el a bisa. For di area di e edificio a los tiro. “Despues a sosode loke tur hende a mira riba imagennan,” el a bisa den un declaracion.
El a bisa tambe cu Polis sin ningun motibo a tira gas lacrimogeno riba e multitud, a menas’e cu arma, cu polis no a haci nada pa protege y cu ta cu hopi problema e mester a busca forma pa protege su mes.
Biervliet a rechasa tur uzo di violencia y otro actonan y ta desea tur comerciantenan cu a sufri daño forsa.
E demostracion tabata contra e maneho economico y nombramento di miembronan di famia di presidente Santokhi na puestonan importante.
A penetra den e edificio di Parlamento na Paramaribo, a comete destruccion y cende candela. Segun Minister di Husticia Amoksi y Polis, e tabata un accion organisa y planea. A drenta den negoshinan y a horta cantidad di mercancia.
Polis a haci rond di 120 aresto. Diesnuebe persona a meld na hospitalnan. Tin persona cu herida di tiro, pero tambe personanan cu tabatin problema cu gas lacrimogeno.
E centro di Paramaribo tabata cera ayera cu hekki. Minister Amoksi a bisa cu pa awo esaki ta keda asina, solamente pa trafico cu mester bay eynan. Mercadonan lo ta habri diadomingo, pero e tiendanan den Paramaribo lo ta cera.
