Cu alegria keda como recuerdo di e temporada dushi aki
Aruba a pasa un fin di siman carnavalesco exitoso disfrutando di e.o. nos Lighting Parade, Jouve Morning y Parada Grandi di Mucha na San Nicolaas. A resalta un biaha mas e buniteza y creatividad riba caya y un ambiente formidabel.
Awo nos ta drenta e siman final di celebracion di Carnaval 69 y Minister di Cultura, Sra. Xiomara Maduro ta haci uzo di e oportunidad pa invita henter comunidad, tanto participante-y mirones pa ban celebra e final di Carnaval 69 den union y na un manera sano.
Ban un bes mas mustra mundo cu Aruba ta celebra Carnaval den tur seguridad y yen di alegria presentando su creatividad pa asina aporta na e expresion di mas grandi y bunita di cultura na nos pais. Laga nos brinda nos gratitud, sosten y apoyo na tur cu ta haci e exposicion mas grandi di nos Cultura posibel.
Esta dushi ta Carnaval, pero ban cuida loke ta di nos, ban cuida nos yiunan den e dianan aki. No lubida tambe pa cuida nan oido, uza earplugs. Como tambe cuida nan di solo, uza sunblock y duna nan hopi awa. Laga nos cuida nos mes tambe. No abusa di ningun substancia ta e mensahe di Minister Maduro pa e final di e temporada di Carnaval.
Ban mantene nos Carnaval un fiesta grandi unda nos ta comparti cu otro na un manera sano y cu alegria keda como recuerdo di e temporada dushi aki. Pasa un feliz y dushi Carnaval 69 den compania di famia y amistadnan. Pabien Aruba!
