Minister di Asuntonan Economico, Comunicacion y Desaroyo Sostenibel, mr. Geoffrey Wever, a habri e prome NSS Seminar “Building a modern National Statistical System – Emerging data needs for monitoring sustainable development”. Minister Geoffrey Wever ta implementando e Nationaal Statistisch Systeem, NSS, den cual ta importante pa stakeholders ta bon informa di locual NSS lo nifica den practica y e beneficionan di e sistema aki.
E seminario tabata bon atendi door di varios miembro di Parlamento di Aruba, sector publico, sector priva y NGO’s, cual ta demostra e interes y sosten pa e NSS.
Minister Wever ta contento cu e sosten cu Aruba ta hayando di organisacionnan internacional renombra, manera United Nations Statistical Division (UNSD) y United Nations Economic Commission for Latin America and the Caribbean (UN-ECLAC) den implementacion di e NSS.
Señor Gabriel Gamez di UNSD ta experto cu experiencia amplio den implementacion di NSS na diferente paisnan y ta accentua cu e ciudadanonan y usuarionan di datos ta e centro di e NSS.
Minister Geoffrey Wever ta splica cu e NSS ta un mecanismo clave cu Aruba mester den modernisacion di e fundeshi di nos economia y pa sigura un futuro sostenibel pa Aruba y pa generacionnan cu ta bin. E Sustainable Development Goals Framework ta enfatisa tambe cu un NSS ta un sistema esencial pa traha riba desaroyo sostenibel. E NSS ta parti tambe di implemenatcion di SDGs.
Den e “fast-paced world” cu nos ta biba aden, datos y informacion ta hunga un rol crucial den tuma decision, planificacion y desaroyo di maneho. Aunke esey ta e caso, tin ora hende ta usa datos cu no ta completo of no ta confiabel, cual ta haci cu no tin un bista completo di e retonan cu ta (bai) enfrenta. E NSS lo fiha pa cambia esey door di provee pa usuario datos di calidad halto, actual y imparcial pa por tuma decisionnan abase di informacion corecto.
“Cu e implementacion di e NSS, Aruba lo tin datos necesario pa por monitorea nos progreso, identifica areanan di mehoracion y tuma decision abase di informacion confiabel cual ta den beneficion di tur nos cuidadanonan. Mi ta contento cu e acogida di e seminario y ta gradici tur cu tabata presente. Mi ta sigur cu e fundacion aki estableci, nos por traha hunto na crea un miho y mas prospero futuro pa Aruba”, Minister Geoffrey Wever ta conclui.
