Siman pasa, Minister di Husticia y Asuntonan Social Sr. Rocco Tjon hunto cu directiva di Family Justice Center (FJC) a refleha riba e trayecto tras di lomba, pa loke ta FJC. Manera ta conoci, FJC ta trahando riba e tereno di Husticia, Salubridad Publico y Social cu e vision pa instancianan hudicial, medico y social traha mas cerca di otro. E meta ta pa ofrece ayudo y un servicio mucho mas miho y mas completo cu ta posibel na victimanan di abuso sexual y violencia relacional fisico severo; te unda cu ta posibel y bou di un solo dak. Desde 2021 FJC ta trahando pa yega na un edificio adecua, sin mas, a cuminsa prepara y ekipa e cadena hudicial, social y medico pa mehora e servicionan y ayudo na victimanan.
Durante e ultimo dos añanan, FJC den un colaboracion estrecho cu Ministerio di Hustica y Asuntonan Social y e socionan den e cadena hudicial, social y medico a realisa varios logro.
Manera ta conoci, den transcurso di aña pasa, a organisa e training “kindverhoor” pa e personal di JZP y tres psicologo cu ta sostene JZP den casonan mas dificil y complica y tambe den preparacion di menornan pa e verhoor. Banda di esaki a aumenta e cantidad di rechercheurs na JZP pa nan tin un team completo a base di nan formatierapport y a obtene tur e materialnan electronico pa por instala esakinan den e verhoorruimte di JZP.
Tambe por bisa cu a train e cadena social y hudicial hunto cu e European Family Justice Center Alliance con pa reacciona mihor posibel den casonan di abuso domestico severo y “zedenzaken” y tambe pa compronde mihor e dinamica den e casonan aki.
Hunto cu Ministerio y Departamento di Salubridad Publico (DVG) a logra pa Aruba tin su propio dokter specialisando desde maart 2022 pa bira medico forensico pa Aruba. Mientrastanto tambe a logra pa contrata un medico forensico for di Hulanda desde 1 di december 2022. E desaroyo aki tin bentahanan y ta un logro grandi pa cu e cadena hudicial, social y medico. Tambe por bisa cu a crea e contactonan y ta canando e caminda pa por bin cu e opleiding di recherche psycholoog pa tanto Aruba como e otro islanan den reino. A organisa tambe un E- learning training di AUGEO foundation pa 150 profesionalnan riba e tereno medico, e training nan ta specifico riba e area medico y ta trata e temanan entre otro “reconoce señalnan di maltrato cerca pashentnan” y “con pa dirigi combersacionnan complica ora di precupacionnan pa cu señalnan di abuso/maltrato di como menor of adulto”.
Remarkabel ta cu e e-learning training menciona ta wordo coordina conhuntamente cu Codigo di Proteccion. Ta haciendo sondeo riba tereno social pa cu e necesidad pa training specifico asina cu por ekipa e profesionalnan cu e debido conocemento, pa asina keda brinda un miho ayudo na victimanan di abuso sexual y abuso fisico severo. Tambe a firma un MOU cu European Family Justice Center Alliance y Gobierno di Boneiro den cuadro di un colaboracion pa ambos Family Justice Center. A haci palabracionan concreto unda cu lo intercambia experticio y conocemento cu otro pa por combati violencia domestico y violencia relacional conhuntamente. Tambe ta di suma importancia pa duna atencion y cuido na victimanan di abuso sexual. Hunto cu FCCA ta sondeando posibilidadnan pa por ahusta e edificio cu lo mester acapara e trabounan di e FJC.
Por ultimo, Ministerio di Husticia y Asuntonan Social conhuntamente cu FJC ta gradici tur partner pa nan confiansa y lo keda traha pa sigui concretisa procesonan cardinal entre e diferente instancianan den e cadena hudicial, social y medico cu asina por yuda hisa e calidad di investigacionan y ayudo, pero tambe pa trata di haci e proceso mas accesibel y lihe pa e victima.
